१२५ सीसी सेगमेन्टमा पल्सर सिरिजको नयाँ प्रिमियम बाइक लन्च गर्ने अन्तिम तयारीमा बजाज

बजाज अटोले १२५ सीसी सेगमेन्टमा नयाँ बाइक लन्च गर्ने तयारी गरिरहेको छ । सो नयाँ बाइकका साथ कम्पनी प्रिमियम १२५ सीसी बाइक सेगमेन्टमा पहिले देखि नै बजारमा उपलब्ध टीभीएस रेडर र हिरो एक्सट्रिम १२५आर जस्ता बाइकलाई चुनौती दिने तयारी गरिरहेको छ ।

मिडिया रिपोर्टका अनुसार बजाजले सबैभन्दा बढी बिक्ने मोडल पल्सरको नयाँ मोडल पल्सर एन१२५ लन्च गर्ने तयारी गरिरहेको छ । कम्पनीले सो बाइक लन्च गर्ने मिति अक्टोबर १६ फाइनल समेत गरेको छ, यद्यपि कम्पनीले मोडलको खुलासा भने गरेको छैन । तर पनि सो बाइक पल्सर एन१२५ हुने धेरैले अनुमान गरेका छन् ।

सो बाइक धेरै पटक परीक्षणको समयमा समेत देखिएको छ । अब भने यसको लन्च समय समेत आइपुगेको छ ।

पहिले नै लिक भएको तस्बिर अनुसार सो बाइक स्पोर्टी र स्टाइलिस हुनेछ । हाल बजाजले पल्सर रेन्जमा पल्सर १२५ स्ट्यान्डर्ड र पल्सर एनएस १२५ बिक्री गरिरहेको छ । अब पल्सर एन रेन्जमा नयाँ बाइक आए पश्चात १२५ सीसीका तीन मोडल उपलब्ध हुनेछन् । स्पोर्टी डिजाइनमा उपलब्ध हुने पल्सर एन१२५ ले विशेष गरी युवा ग्राहकलाई आकर्षित गर्ने अनुमान गरिएको छ ।

बजाज पल्सर एन१२५ एक प्रिमियम कम्युटर बाइक हुन सक्ने छ । स्पाई इमेज अनुसार सो मोटरसाइकलमा मस्कुलर लुकयुक्त फ्युल ट्यांक, स्प्लिट सिट र टु पिस ग्र्याब रेल हुनेछ । यसमा एलईडी हेडल्याम्प र एलईडी टेलल्याम्प समेत हुनेछ ।

अन्य कम्पनीका यही सेगमेन्टका बाइकसँग प्रतिस्पर्धा गर्नका लागि पल्सर एन१२५ मा एबीएस ब्रेकिङ जस्ता एड्भान्स्ड फिचर पनि हुन सक्ने छ । यद्यपि सो बाइक सिंगल च्यानल एबीएसका साथ उपलब्ध हुने अनुमान गरिएको छ ।

नयाँ पल्सर एन१२५ मा हाल उपलब्ध पल्सर १२५ कै सिंगल सिलिन्डर इन्जिन उपलब्ध हुने अनुमान छ । यद्यपि बाइकलाई स्पोर्टी क्यारेक्टर दिने गरी इन्जिनमा केही परिवर्तन समेत हुन सक्ने छ । यसलाई फाइभ–स्पिड गियरबक्सका साथ जोडिने छ । यसको मूल्य भारतीय बजारमा ९० हजार देखि १ लाख भारु सम्म हुने अनुमान गरिएको छ ।

बाइकमा स्मार्टफोन कनेक्टिभिटी र ब्लुटुथका साथ डिजिटल कन्सोल समेत उपलब्ध हुन सक्ने अनुमान गरिएको छ ।