पहिले भन्दा धेरै सस्तो मूल्यमा अब बीवाईडीका इलेक्ट्रिक गाडी नेपालमा, यस्तो छ नयाँ मूल्य सूची

काठमाडौं – नेपाली बजारमा उपलब्ध बीवाईडीका इलेक्ट्रिक कारको नयाँ मूल्य सूची सार्वजनिक भएको छ । नेपालमा बीवाईडीका इलेक्ट्रिक गाडी उपलब्ध गराइरहेको साइमेक्स इंकले आज नयाँ परिमार्जित मूल्य सूची सार्वजनिक गरेको हो ।

नेपाली बजारमा उपलब्ध बीवाईडी ई६ को मूल्य ५० लाख, एम३ ७ सिटरको मूल्य ४६ लाख, एम३ ५ सिटरको मूल्य ४३ लाख र टी३ २ सिटरको मूल्य ३८ लाख रुपैयाँ तोकिएको छ ।

गत वर्ष बजेट सार्वजनिक हुनु पहिले नेपाली बजारमा बीवाईडी ई६ को मूल्य ६६ लाख र बीवाईडी एम३ ७ सिटरको मूल्य ४९ लाख रुपैयाँ रहेको थियो । त्यसैगरी बीवाईडी टी३ २ सिटरको मूल्य ४७ लाख रुपैयाँ रहेको थियो ।

तत्कालीन अर्थमन्त्री डा. युवराज खतिवडाले हाल चालु आर्थिक वर्षका लागि प्रस्तुत गरेको बजेटमार्फत अन्तःशुल्क र भन्सार दरमा व्यापक वृद्धि गरे पश्चात कम्पनीले नयाँ मूल्य सूची नै सार्वजनिक गरेको थिएन । हाल अन्तःशुल्कमा पुरै छुट र भन्सार दरमा पनि व्यापक कटौती गरिए पश्चात बीवाईडीका इलेक्ट्रिक गाडीको मूल्य पनि पहिले भन्दा निकै नै घटेको हो ।

बीवाईडी ई६ अल–इलेक्ट्रिक कम्प्याक्ट क्रसओभर वा कम्प्याक्ट एमपीभी हो । एक पटक फुल चार्ज गर्दा यसलाई ४ सय किलोमिटर सम्म चलाउन सकिन्छ । यसमा ९० किलोवाट आवरको इलेक्ट्रिक मोटर रहेको छ । यसलाई ८० किलोवाट आवरको लिथियम आइरन फस्फेट ब्याट्रीसँग जोडिएको छ, जसका कारण सिंगल चार्जमा यसलाई ४ सय किलोमिटर सम्म गुडाउन सकिन्छ ।

बीवाईडी एम३ ७ सिटर भ्यान हो । बीवाईडीको विशेष गुणस्तरीय एनसीएम ब्याट्रीयुक्त सो गाडीले सिंगल चार्जमा ३१० किलोमिटर रेन्ज दिन सक्छ ।

टी३ चाहिं इलेक्ट्रिक भ्यान हो । सामान ओसारपसार गर्नका लागि यसको प्रयोग गर्न सकिन्छ ।

बीवाईडीका यी गाडीको मूल्य र थप विशेषता यो लिंकबाट थाहा पाउन सकिन्छ ।