४९० किलोमिटर रेन्ज दिने नयाँ कोना आउँदै, फिचर र व्याट्रीको साइज पनि वढ्ने

हुन्डाइले आफ्नो पहिलो इलेक्ट्रिक क्रसओभर कोनामा ठूलो साइजको व्याट्री र फिचर थप गरेर सेकेन्ड जेनेरशन ल्याउने भएको छ । हाल विक्री हुँदै आएको कोना ३९.२ र ६४ किलोवाट आवरको व्याट्री प्याकमा उपलब्ध रहँदै आएकोमा यसलाई बढाएर ४८.४ र ६५.४ किलोवाट आवर पुर्याउन लागिएको हो । व्याट्रीको साइज वढेसंगै यसले दिने रेन्जमा समेत बृद्धि हुनेछ । नयाँ कोनाले ४९० किलोमिटरसम्म रेन्ज दिने दावी गरिएको छ ।

नयाँ कोना पुरानो मोडलको तुलनामा केही ठूलो समेत हुनेछ । यसको लम्वाई पुरानो कोनाभन्दा १७५ एमएम, चौडाई २५ एमएम, उचाई २० एमएम र ह्विलवेश ६० एमएम वढी हुनेछ । साथै यसको डिजाइनमा समेत व्यापक परिमार्जन गरिने भएको छ । यसको क्याविन आयोनिक लाइनअप वाट प्रेरित भई निर्माण गरिनेछ ।

नयाँ कोनामा इन्स्ट्रयूमेन्ट क्लस्टर र इन्फोटेन्मेन्ट सिस्टमका लागी १२.३ इन्चको दुईवटा डिस्प्ले रहनेछ । साथै यसमा १२ इन्चको हेडअप डिस्प्ले, कनेक्टेड कार टेक्नोलोजी, एम्विएन्ट लाइटिङ र सवउफर सहितको ८ स्पिक वोस साउन्ड सिस्टम पाउन सकिनेछ । यो इलेक्ट्रिक कारमा आयोनिक ५ मा जस्तै भेइकल टु लोड फिचर समेत उपलब्ध हुनेछ ।

सेफ्टि फिचर अन्तर्गत यसमा ३६० डिग्री क्यामेरा, ६ वटा एयरव्याग र एडिएएस टेक्नोलोजी लगायत अन्थ थुप्रै विशेषता पाउन सकिनेछ । यसमा जडान गरिएको व्याट्रीलाई फास्ट चार्जरको साहयतामा ४१ मिनेट भित्र १० देखी ८० प्रतिशतसम्म चार्ज गर्न सकिन्छ ।

नेपाली इभी पारखीमाझ लोकप्रिय वनिरहेको कोना हाल ३९.२ किलोवाट आवरको व्याट्री प्याकमा उपलब्ध छ । यो इलेक्ट्रिक कारले एकपटकको फुल चार्जमा ३२० किलोमिटर रेन्ज दिने दावी गरिएको छ । नेपाली बजारमा यसको मूल्य ६४ लाख ५६ हजार रुपैयाँसम्म निर्धारण गरिएको छ । नयाँ कोना अर्को वर्ष नेपाली बजारमा उपलब्ध हुने अनुमान गरिएको छ ।