नेपाली शोरुममा आइपुग्यो सिंगल चार्जमा ५ सय किमी दिने ओराको इलेक्ट्रिक कार गुड क्याट

काठमाडौं– चिनियाँ कम्पनी ओराको इलेक्ट्रिक कार गुड क्याट नेपाली बजारमा आइपुगेको छ । नेपालका लागि ग्रेटवाल र ह्यावलको समेत वितरक रहेको आधिकारिक वितरक भीजी इम्पेक्सले ओरा गुड क्याट भित्र्याएको हो । ग्रेटवालको इलेक्ट्रिक ब्रान्डको नाम ओरा हो ।

हाल परीक्षणका लागि केही थान कार मात्र भित्र्याएको कम्पनी स्रोतले बताएको छ । टेक, प्रो र अल्ट्रा गरी तीन भेरिएन्टमा उपलब्ध यो कारको मूल्य क्रमशः ३९ लाख ९९ हजार, ४३ लाख ९९ हजार र ४७ लाख ९९ हजार रुपैयाँ तोकिएको छ ।

१०५ किलोवाटको मोटर रहेको यो कारको दुई भेरिएन्ट टेक र प्रोमा ४७.७८८ किलोवाट र अर्को भेरिएन्ट अल्ट्रामा ६३.१३० किलोवाटको ब्याट्री छ । जसले सिंगल चार्जमा क्रमशः ४०० र ५०० किलोमिटरको दूरी तय गर्ने क्षमता राख्छ । यसले १४३ पीएस पावर र २१० एनएम टर्क जेनेरेट गर्ने क्षमता राख्छ ।

यी कारको वास्तविक फिचर अझै कम्पनीले सार्वजनिक गरेको छैन । यद्यपि यसमा प्रिमियम ड्युअल टोन इन्टेरियर, १८ इन्चको टायर, प्यानोरामिक सनरुफ, १०.२५ इन्चको फ्लोटिङ स्क्रिनलगायतका विभिन्न फिचर पाउन सकिन्छ ।

नेपाली बजारमा अन्य मोडलका कार समेत उपलब्ध भइरहेको समयमा ओरा गुड क्याट समेत एउटा अर्को इलेक्ट्रिक कारको रुपमा भित्रिएको छ । यसको वारेमा ग्राहक प्रतिक्रिया भने आगामी दिनमा देखिदै जानेछ ।