विद्युतीय गाडीमा रुपान्तरण गर्न आवश्यक मापदण्ड तथा कार्यविधि बन्ने निर्देशक पौडेलको भनाइ

काठमाडौं – यातायात व्यवस्था विभागले प्रत्येक प्रदेशमा १ केन्द्र रहने गरी विद्युतीय लगायतका सवारी साधनहरुको परीक्षण गर्न मेसिन उपकरणहरु सहितका सवारी परीक्षण कार्यालयहरु अर्थात भेइकल फिटनेस टेस्टिङ सेन्टर स्थापना गर्न लागेको छ ।

नेपाल अटोले हिजो नेपाल अटोमोबाइल्स एसोसिएसन (नासा) सँगको सहकार्यमा जुममार्फत गरेको विद्युतीय सवारी साधन प्रवद्र्धन र यसका लागि विभिन्न चुनौतीहरुको वारेमा गरेको भर्चुअल अन्तरक्रियामा यातायात व्यवस्था विभागका प्राविधिकतर्फका निर्देशक रामचन्द्र पौडेलले सो जानकारी दिएका हुन् ।

उनले विद्युतीय सवारी साधन सम्बन्धमा सरकारले लिएको नयाँ नीति र पहिले देखि नै सञ्चालनमा रहेका विभिन्न नीति तथा कार्यक्रमको वारेमा जानकारी प्रदान गरेका थिए । पौडेलले प्रविधिको प्राप्ति तथा प्रयोगका विषयमा विभाग अग्रसर रहेको बताए ।

उनले विद्युतीय सवारीमा रुपान्तरण हुने सवारीलाई दिइने सडक निर्माण तथा संभार दस्तुर छुटको विषय बजेट वक्तव्यमा परेको हुँदा यसको कार्यान्वयन विधि अर्थ मन्त्रालयबाट तय हुने तथा हाल विभाग र मातहत कार्यालयहरुमा डाइनामोमिटर सुविधा नभएको हुँदा विद्युतीय सवारीहरुको सडक परीक्षण, विशेष गरी ग्रेडेबिलिटी परीक्षण गर्नका लागि उपत्यकामा उपलब्ध भएका सेतो गुम्बा लगायतका स्थानहरुमा सडक परीक्षण गर्ने गरिएको बताए ।

देशको राजनीतिक अवस्था, राजस्व परिचालनका प्राथमिकता र समग्र अर्थ व्यवस्थाको अवस्थाका आधारमा सरकारले आवश्यकता अनुसार नीति पुनरावलोकन गर्दै आएको छ । जिवाश्म इन्धनमा आधारित सवारीलाई विद्युतीय सवारीमा रुपान्तरण गर्नका लागि प्रचलित सवारी तथा यातायात व्यवस्था कानुन अनुसार सम्बन्धित यातायात व्यवस्था कार्यालयबाट स्वीकृति लिनु पर्छ । यसका लागि आवश्यक मापदण्ड तथा कार्यविधि आ.व. २०७८।७९ भित्र जारी हुने पौडेलले बताए ।

उनले देश भित्र निर्माण हुने सार्वजनिक चार्जिङ स्टेशनहरु विभिन्न प्रकार र निर्माताका सवारीहरुलाई उपयुक्त हुने गरी निर्माण गरिनु पर्ने विचार व्यक्त गरे ।