नयाँ वर्ष पश्चात नेपाली बजारमा पहिलो लन्च हुने कार बन्दै सुजुकी सेलेरियो

काठमाडौं – नेपाली बजारमा सुजुकी सेलेरियो कारको प्रि–बुकिङ प्रारम्भ भएको छ । नेपालका लागि सुजुकीको आधिकारिक वितरक सीजी मोटोकर्पले यो कारको प्रि–बुकिङ खुलेको बताएको छ ।

सुजुकी सेलेरियो सन् २०२२ मा नेपाली बजारमा लन्च हुने पहिलो कार हुने अनुमान गरिएको छ । सीजी मोटोकर्प स्रोतका अनुसार माघ महिना भित्र यो नेपाली बजारमा बिक्रीका लागि उपलब्ध हुनेछ ।

सुजुकी सेलेरियो केही समय पहिले भारतमा लन्च भएको र सबैभन्दा बढी माइलेज दिने कारको रुपमा परिचित छ । सुजुकी सेलेरियो पहिले देखि नै बजारमा उपलब्ध भए पनि अब आउने नयाँ सेकेन्ड जेनेरेसन मोडल हो । यसमा १.० लिटर के१०सी के सिरिज डुअलजेट, डुअल भीभीटी पेट्रोल इन्जिन र ५ स्पिड म्यानुअल र अटोमेटिक गियरबक्समा उपलब्ध छ । यसमा दिइएको इन्जिनले अधिकतम ६६ हर्स पावर र ८९ एनएम टर्क प्रदान गर्छ । यसअघिको सेलेरियोको तुलनामा नयाँ इन्जिनले २ हर्स पावर र एक एनएम टर्क कम उत्पादन गर्छ । नेपाली बजारमा उपलब्ध हुने इन्जिन क्षमता र यसको भेरिएन्ट वारेमा पछि थाहा हुनेछ ।

नयाँ सेलेरियो २६.६८ किलोमिटर प्रति लिटरको माइलेज प्रदान गर्ने क्षमता रहेको छ । माइलेज बढाउन आइडल स्टार्ट–स्टप फिचर दिइएको छ ।

नयाँ मारुती सेलेरियोमा एप्पल कारप्ले र एन्ड्रोइड अटोलाई सपोर्ट गर्ने टचस्क्रिन इन्फोटेनमेन्ट स्क्रिन जस्ता फिचर समावेश गरिएको छ । साथै आइडल स्टार्ट/स्टप फङसनको साथ पुश स्टार्ट÷स्टप बटन पनि समावेश गरिएको छ ।

लन्चिङ पछि सो कार इन्ट्री–लेभल ह्याचब्याक सेगमेन्टमा रेनो क्विड, हुन्डाई स्यान्ट्रो र टाटा टियागो जस्ता कारसँग प्रतिस्पर्धा गर्नेछ ।