एक हप्तामै नयाँ एट्टो ३ ले पायो ३० हजार बढी अर्डर, नेपालमा प्रतीक्षा

बीवाईडीको नयाँ एट्टो ३ ले एक हप्तामै ३० हजारभन्दा बढी अर्डर प्राप्त गरेको छ । घरेलु बजारमा युआन प्लसको नामले बिक्री हुने सो विद्युतीय एसयूभीको सुरुवाती मूल्य चिनियाँ बजारमा १६ हजार ६०० अमेरिकी डलर निर्धारण गरिएको छ ।

बीवाईडीको ई–प्लेटफर्म ३.० ईभो आर्किटेक्चरमा निर्माण गरिएको नयाँ एट्टो ३ मा कम्पनीको सेकेन्ड जेनेरेसन ब्लेड ब्याट्री जडान गरिएको छ । फ्ल्यास चार्जर समेत सपोर्ट गर्ने यस एसयूभीमा ५७.५ किलोवाट आवर र ६८.५ किलोवाट आवर क्षमताको ब्याट्री विकल्प दिइएको छ । जसले क्रमशः ५४० किलोमिटर र ६३० किलोमिटर सीएलटीसी रेन्ज प्रदान गर्ने दाबी गरिएको छ ।

यसअघिको मोडलले भन्दा १२० किलोमिटर रेन्ज प्रदान गर्ने नयाँ एट्टो ३ लाई फ्ल्यास चार्जिङको सहायतामा ९ मिनेटमै १० देखि ९७ प्रतिशतसम्म चार्ज गर्न सकिन्छ । रेन्ज र चार्जिङ दुबैमा ब्यापक सुधार भएका कारण यसको माग चीनसहित विश्वका अन्य बजारमा समेत ब्यापक वृध्दि हुने अनुमान गरिएको छ ।

नयाँ एट्टो ३ आकारका हिसावले समेत केही ठूलो भएर आएको छ । यसको लम्बाई ४,६६५ एमएम, चौडाइ १,८९५ एमएम र उचाइ १,६७५ एमएम तथा ह्विलवेश २,७७० एमएम छ । साथै, यसको अगाडि १८० लिटरको पावर ट्रंक र पछाडि ७५० किलोमिटर क्षमताको कार्गो स्पेस दिइएको छ ।

कारलाई आरामदायी बनाउन बीवाईडीले यसको अगाडि म्याकफर्सन र पछाडि फाईभ लिंक इनडिपेन्डेन्ट सस्पेन्सन सेटअप उपलब्ध गराएको छ । साथै, यसमा डिसस–सी इन्टेलिजेन्ट ड्याम्पिङ बडी कन्ट्रोल सिस्टम, आईट्याक २.० टर्क कन्ट्रोल र टीबीसी टायर ब्लोआउट लागयत आधुनिक फिचर समेत उपलब्ध गराइएको छ ।

नयाँ एट्टो ३ को उच्च ट्रिममा बीवाईडीले आफ्नो उन्नत ड्राइभर एसिस्टेन्ट सिस्टम डीपायलट ३०० समेत उपलब्ध गराएको छ । कारमा ३० भन्दा बढी सेन्सरजडित अत्याधुनिक लिडार समेत राखिएको छ ।

नयाँ एट्टो ३ नेपाली बजारका लागि समेत प्रतीक्षा गरिएको एसयूभी हो । यसअघिको मोडलले निकै राम्रो बजार पाएको सन्दर्भमा नयाँ एट्टो ३ अहिलेदेखि नै नेपाली ईभी पारखीमाझ चर्चाको विषय बनिरहेको छ ।