नेटा भी VS नेक्सन ईभी : कुन विशेषतामा कुन अगाडि ?

१ सय किलोवाट भन्दा कम क्षमता भएको मोटर जडित इलेक्ट्रिक कारमा अहिले टाटा नेक्सन ईभी र नेटा भी निकै चर्चित वनिरहेका छन् । १ बर्षअघि नेपाल भित्रिएको नेक्सन ईभी र हालसालै मात्र आएको नेटा भीले कम मूल्यमा इलेक्ट्रिक कार खरिद गर्न चाहने ईभी पारखीलाई आकर्षित गरिरहेको छ ।

नेटा भी भन्दा २ लाख रुपैयाँले महंगो पर्ने नेक्सन ईभीमा जडान गरिएको व्याट्री साइज नेटा भीको तुलनामा केही सानो भएपनि मोटर पावर भने नेक्सनमा बढी छ । नेक्नसमा ३० किलोवाट आवर क्षमताको व्याट्री जडान गरिएको छ भने नेटा भीमा ३८.५ किलोवाट आवरको व्याट्री प्याक दिइएको छ । यी दुई कारमा दिइएको मोटर पावर ९५ किलोवाट र ७० किलोवाट छ । सामन्यतः व्याट्री साइज ठूलो हुँदा मोटर पावर पनि बढी हुनपर्ने हो तर नेटा भीमा भने यो नियम लागु भएको पाइदैन । होजोन मोटर्सले यसको रेन्ज बढाउन कम पावरको मोटर दिइएको सहजै अनुमान गर्न सकिन्छ । नेटा भीको रेन्ज ४ सय किलोमिटर दावी गरिँदा नेक्सन ईभीले ३१२ किलोमिटर प्रदान गर्ने दावी छ ।

ग्राउन्ड क्लियरेन्सका मामलमा समेत नेक्सन ईभी नेटा भीको तुलनामा मजवुत देखिन्छ । टाटाको यो इलेक्ट्रिक कारमा २०५ एमएम ग्राउन्ड क्लियरेन्स दिइँदा नेटा भीमा जम्मा १६० एमएम मात्रै छ । यसैगरी सेफ्टिको कुरा गर्नुपर्दा नेक्सनको कम्वस्चन इन्जिनयुक्त गाडीले सेफ्टि टेष्टमा ५ स्टार रेटिङ पाएको र सोही गाडीको इलेक्ट्रिक भर्सन भएका कारण नेक्सन ईभीलाई समेत ५ स्टार रेटिङकै क्याटागोरीमा राख्ने गरेको पाइन्छ भने नेटा भीको हालसम्म सेफ्टि टेष्ट गरिएको छैन ।

नेक्सन ईभीमा दिइएका केही महत्वपूर्ण फिचर्स नेटा भीमा देख्न सकिँदैन । जस्तो अटोमेटिक रेन वाइपर, फोल्डेवल ओआरभिएम, रियर ग्लास वाइपर, कुल्ड ग्लोभ वक्स, एडजस्टेवल स्टेयरिङ ह्विल, हाइट एड्जस्टेवल ड्राइभर सिट, इन्डिभिज्युअल डोर लक, रियर एसी भेन्ट र वुट स्पेस -याक लगायत फिचर्स नेटा भीमा दिइएको छैन ।

ईभी डेडिकेटेड प्लेटफर्मममा बनेको कार भएका कारण नेटा भीको इन्टेरियर र क्याविन स्पेस नेक्सन ईभीको तुलनामा निकै स्तरिय देखिन्छ । जसका कारण यो कारमा सयर गर्दा नेक्सन ईभीको तुलनामा आरामदायी फिल हुन्छ । नेटा भीमा क्याविन एयर फिल्टर, थर्मल म्यानेजमेन्ट र व्याट्री हिटिङ सिस्टम समेत उपलब्ध भएपनि नेक्सन ईभीमा यी फिचर्स दिइएको छैन ।

चार्जिङ पूर्वाधारको कुरा गर्दा नेक्सन ईभीलाई चार्ज गर्न आधिकारिक वितरक सिप्रदी ट्रेडिङ प्रालिले देशका ११६ स्थानमा चार्जिङ स्टेशन विस्तार गरिसकेको छ भने नेटा भीको हालसम्म कुनै चार्जिङ स्टेशन उपलब्ध छैन । आफ्टर सेल्स सर्भिसका लागि सिप्रदीको देशभर ३ दर्जन बढी सर्भिस सेन्टर संचालनमा छन् भने नयाँ ब्रान्ड भएका कारण नेटा भीलाई यस्तो सेन्टर विस्तार गर्न लामै समय लाग्ने देखिन्छ ।