नेटा एसको नयाँ स्पेक सार्वजनिक : नयाँ प्रविधिको क्विलिन ब्याट्रीले १,०७५ किमी रेन्ज दिने

चाइनिज अटोमोबाइल निर्माता कम्पनी होजोन अटोद्वारा उत्पादन गरिने नेटा एस इलेक्ट्रिक सेडानको स्पेसिफिकेसन सार्वजनिक भएको छ । चीनको उद्योग तथा सूचना प्रविधि मन्त्रालयले सार्वजनिक गरेको स्पेक अनुसार नयाँ कारमा सीएटीएलको पछिल्लो प्रविधिको क्विलिन ब्याट्री हुनेछ र यसले १ हजार ७५ किलोमिटर रेन्ज दिनेछ ।

आगामी दिनमा बजारमा आउने नेटा एस सिंगल फ्रन्ट मोटरद्वारा संचालित हुनेछ र बढीमा २०० किलोवाटको पावर हुनेछ । यसको क्षमता ११७.०४ किलोवाट हुनेछ ।

नेटा एस सेडान चिनियाँ बजारमा सबैभन्दा पहिले २०२२ को जुनमा उपलब्ध भएको थियो । यो फुल्ली इलेक्ट्रिक ईभी र रेन्ज एक्सटेन्डर ईआरईभी सहित विभिन्न १० भेरिएन्टमा उपलब्ध छ । ती मध्ये यसले तीन प्रकारका रेन्ज ५२०, ६५० र ७१५ किलोमिटरको रेन्ज दिन सक्ने क्षमता छ । यसको मूल्य २६ हजार ६ सय देखि ४७ हजार ९ सय डलर सम्म छ ।

नेटा एसको फ्रन्ट फेस ल्याटिन अक्षर पाई बाट प्रभावित छ । कम्पनीका अनुसार यसको सेन्टर अफ ग्राभिटी कम अनुभव हुन्छ । त्यसैगरी यसको दुवैतिर भएका डे टाइम रनिङ लाइट स्पष्ट देखिन्छन् ।

यसमा भएको प्यानोरामिक सनरुफले ८५ प्रतिशत हिट र ९९.९ प्रतिशत अल्ट्राभायोलेट किरणलाई रोक्ने नेटाको दावी छ ।

इन्टेरियरमा २.५ के रिजोलुसन सहितको १७.६ इन्चको सेन्ट्रल कन्सोल भर्टिकल स्क्रिन छ । को–पाइलटका लागि १२.३ इन्चको इन्फोटेनमेन्ट स्क्रिन छ । यसमा कम्प्युटिङ प्ल्याटफर्म सपोर्ट गर्नका लागि क्वाल्कम स्न्यापड्रागन ८१५५ चिप छ । साउन्ड सिस्टमका लागि विभिन्न स्थानमा २१ स्पिकर रहेका छन् ।