एक वर्षमा १ लाख ५२ हजार बढी नेटा भी बिक्री, अब थप राष्ट्रमा प्रवेश गर्ने

सन् २०२२ मा १ लाख ५२ हजार भन्दा बढी नेटा इलेक्ट्रिक कार बिक्री भएको कम्पनीको भनाइ छ । याे गत वर्ष भन्दा ११८ प्रतिशत बढी हो । यो संगै होजोन अटोद्वारा उत्पादित इलेक्ट्रिक कार नेटा भी अन्य एसियाली राष्ट्रमा समेत प्रवेश गर्ने तयारी गरेको छ ।

थाइल्यान्ड, नेपाल लगायतका विभिन्न एसियाली राष्ट्रमा उपलब्ध नेटा भी आगामी दिनमा अन्य एसियाली राष्ट्रमा समेत प्रवेश गर्ने बताइएको छ ।

नेपाली बजारमा हाल चाइनिज र भारतीय इलेक्ट्रिक कार निर्माता कम्पनीका इलेक्ट्रिक सवारी साधन उपलब्ध छन् । तर चीन र भारतको बजार हेर्ने हो भने चीनको बजार करिव १०० गुणा नै बढी छ ।

चीनमा अन्य कम्पनीको बर्चस्व रहे पनि भर्खरै उदाउदै गरेका होजोन अटो लगायतका कम्पनीहरु विस्तारै उदाउदै गएका छन् ।

चीनले सन् २०३० सम्म इलेक्ट्रिक मोबिलिटीको क्षेत्रमा वर्ल्ड लिडर बन्ने लक्ष्य लिएको छ । यो कार्यमा चाइनिज कम्पनीहरुले क्वालिटी र पर्फमेन्सका लागि अब्बल सवारी साधन निर्माण गर्ने क्रमलाई तीव्रता दिएको अनुभव गर्न सकिन्छ ।

इलेक्ट्रिक सवारी साधन उत्पादनका लागि आवश्यक पर्ने ब्याट्री र विभिन्न कम्पोनेन्ट समेत चीनले नै उत्पादन गरिरहेको छ । धेरै भारतीय कम्पनीहरु समेत विभिन्न प्रविधिका लागि चाइनिज कम्पनीमै भर पर्ने गरेका छन् ।

नेपाली बजारमा पनि नेटा भी इलेक्ट्रिक कार उपलब्ध छ । गत जेठ महिनामा सीजी मोटर्सले भित्र्याएको नेटा भीले एक पटकको फुल चार्जमा ३८० किलोमिटर भन्दा बढी रेन्ज दिने कम्पनीको भनाइ छ ।

नेटा भीमा संसारको सबैभन्दा ठूलो ब्याट्री उत्पादक कम्पनी सिएटीएलले उत्पादन गरेको ३८.५ किलोवाट आवर ब्याट्री प्रयोग गरिएको छ । नेटा भीको अधिकतम गति १०१ किलोमिटर प्रतिघण्टा रहेको छ ।

फ्रन्ट एक्सएलमा रहेको विद्युतीय मोटरले ७० किलोवाट, ९५ पीएस पावर र १६० एनएम टर्क जेनेरेट गर्छ । यो कारमा गर्मी वा जाडो मौसममा समेत ब्याट्रीको दक्षता कम नहोस् भनेर अटोमेटिक हिटिङ तथा कुलिङ प्रणाली रहेको छ ।

यो कारमा प्रयोग भएको ब्याट्री फुलचार्ज हुन एसी चार्जरबाट ६ घण्टा लाग्छ भने डीसी फास्ट चार्जरबाट ८० प्रतिशतसम्म पुग्न जम्मा २० मिनेटमात्र लाग्छ ।

नेपाली बजारमा नेटा भीको मूल्य ३७ लाख ९९ हजार रुपैयाँ कायम गरिएको छ ।