नेटा र सीएटीएलले ब्याट्री र अन्य प्रविधिमा १० वर्ष सम्म सहकार्य गर्ने

चाइनिज ईभी कम्पनी नेटा अटो र ब्याट्री कम्पनी उत्पादक सीएटीएल बिच १० वर्षका लागि रणनीतिक साझेदारी गर्ने सम्झौता भएको छ ।

गत शुक्रबार सांघाईमा भएको सो सम्झौता अनुसार २०२५ देखि २०३४ सम्म सीएटीएलले नेटाका ईभीका लागि पावर ब्याट्री निर्माण गर्नेछ ।

दुवै कम्पनीले संयुक्त रुपमा शून्य कार्वन, सीएटीएल इन्टिग्रेटेड इन्टेलिजेन्ट च्यासिस (सीआईआईसी), ब्याट्री स्वाप, भेइकल टु ग्रिड (भीटुजी), ब्याट्री रिसाइक्लिङ र बजार विकासमा समेत काम गर्ने छन् ।

नेटा र सीएटीएलले पहिले देखि नै अन्य क्षेत्रमा समेत सहकार्य गर्दै आएका छन् । यो नयाँ सहकार्यबाट नेटालाई ‘चीनको नेटा’ बाट ‘विश्वको नेटा’ मा रुपान्तरण गर्ने विश्वास नेटा अटोले लिएको बताएको छ ।

नेटाले यही वर्षको सेकेन्ड हाफमा सार्वजनिक गर्ने अनुमान गरिएको नेटा एसमा नेटा र सीएटीएलले विकास गरेको सीआईआईसी च्यासिस प्रयोग गर्ने बताएको छ ।

सन् २०१४ अक्टोबरमा स्थापित नेटा चीनको प्रसिद्ध कम्पनी होजोन अटोको ईभी ब्रान्ड हो । त्यसैगरी सीएटीएल विश्वको सबैभन्दा ठूलो ईभी ब्याट्री निर्माता कम्पनी हो ।

नेपाली बजारमा पनि सीजी मोटर्सले नेटा अटोद्वारा उत्पादित ईभी बिक्री–वितरण गरिरहेको छ ।