नेटाले थप्यो भी सिरिजमा २ नयाँ कस्टमाइज मोडल

चिनियाँ इलेक्ट्रिक कार निर्माता नेटाले भी सिरिजमा २ नयाँ कस्टमाइज मोडल थप गरेको छ । उसले चाओ३०० र चाओ ४०० मोडल थप गरेको हो । यी दुवै मोडल कस्टमाइज एडिसन रहेको जनाइएको छ । यी दुई मोडलको मूल्य चिनियाँ बजारमा क्रमश १३ हजार २२५ र १४ हजार २९७ अमेरिकन डलर कायम गरिएको छ ।

यी नयाँ मोडलमा नेटाले हाल कायम रहेको डिजाइन र लुक्सलाई निरन्तरता दिएको छ । यी इलेक्ट्रिक कारको अगाडीको दुवै साइडमा पोलिगनल हेडलाइट र पछाडी वाई आकारको टेल लाइट दिइएको छ । यसैगरी यसको चाओ३०० मोडलमा लेदर स्टेरिङ ह्विल, लेदर सिट, १४.६ इन्चको सेन्ट्रल कन्ट्रोल र एलइडी लाइट उपलब्ध छ ।

अर्को मोडल चाओ४०० मा व्रेकिङ एसिस्टेन्स, लेन डिपार्चर वार्निङ, लेन किपिङ एसिस्टेन्स, एक्टिभ व्रेकिङ, थकान ड्राइभिङ वर्निङ, फ्रन्ट पार्किङ राडर, एडप्टिभ क्रुज कन्ट्रोल, अटोमेटेड भ्यालेट पार्किङ, ड्राइभिङ रेकर्डर र फ्रन्ट वायरलेस चार्जिङ जस्ता अत्याधुनिक फिचर्स दिइएको छ ।

यी दुई कारमध्ये चाओ३०० को अधिकतम पावर ५४ एचपी र टर्क ११० एनएम एवं रेन्ज ३०१ किलोमिटर रहेको छ भने चाओ४०० को पावर ९५ एचपी र टर्क १५० एनएम एवं रेन्ज ४०१ किलोमिटर रहेको दावी गरिएको छ ।

नेटा भी नेपाली बजारमा समेत उपलब्ध रहँदै आएको इलेक्ट्रिक कार हो । ३ महिनाअघि नेपाल भित्रिएको यो कारलाई सिजी मोटर्सले आयत गरी कारोबार गर्दै आइरहेको छ । नेपाली बजारमा उपलव्ध नेटा भीको मूल्य ३८ लाख रुपैयाँ कायम गरिएको छ ।