विद्युत प्राधिकरणले यी ४ स्थानमा चार्जिङ स्टेशन थप गर्ने

नेपाल विद्युत प्राधिकरणले थप ४ स्थानमा चार्जिङ स्टेशन निर्माण गर्न टेण्डर आह्वान गरेको छ । उपत्यकामा सामाखुसी र वल्खु तथा वाहिर मुग्लिन र वर्दिवासमा चार्जिङ स्टेशन निर्माण गर्न टेण्डर मागिएको हो । प्राधिकरणले यसअघि देशका ५० स्थानमा चार्जिङ पूर्वाधार विस्तार गर्ने भन्दै धमाधम काम अघि वढाइरहेको छ ।

यी मध्ये २५ वटा जीबीटी ‘ठूला बस, माइक्रो, ट्रक, पिकअप तथा कार आदिको लागी र २५ वटा साना ठूला कारहरू चार्जर निर्माणको चरणमा रहेको छ । जसका लागि आवश्यक एनएसपी (नेशनल सर्भिस प्रोभाइडर) प्रणालीको विकास गरिएको प्राधिकरणले जनाएको छ । एनएसपीमार्फत उपभोक्ताले अनलाइन बुकिङ गर्न सक्नेछन् । चार्जको रकम भुक्तानीका लागि प्राधिकरणको मोबाइल एप्स प्रयोग गर्न सकिनेछ ।

हाल निर्माण भइरहेको चार्जिङ स्टेसनको क्षमता ६० किलोवाट डीसी प्लस, २२ किलोवाट एसी रहेको समेत प्राधिकरणले जनाएको छ । प्राधिकरणले कम्तीमा आधा घण्टादेखि १ घण्टासम्ममा चार्ज पूर्ण हुन सक्ने दाबी गरेको छ । चार्ज गर्दा कारहरूमा औसत ७० पैसा, एसयूभीहरूमा ८० पैसा, माइक्रोबसमा ९० पैसा र बसहरूमा एक रुपैयाँ २० पैसा प्रति किलोमिटर खर्च लाग्ने लाग्ने समेत प्राधिकरणको भनाई छ ।

प्राधिकरणले हाल उपत्यकामा रत्नपार्क लगायत केही स्थनमा यस्तो स्टेशन निर्माण गरी सेवा दिँदै आएको छ भने राजमार्गका केही स्थानबाट समेत सेवा सुचारु गरिसकेको छ । चार्जिङ स्टेशन विस्तारका लागी उसले नेपाल प्रहरी र शसस्त्र प्रहरीसंग सम्झौता गरेको छ ।

प्राधिकरणसंगै विद्युतिय कार आयत गर्ने विभिन्न कम्पनीहरुले पनि आफ्नो पहलमा देशभर चार्जिङ स्टेशन निर्माण गरिरहेका छन् । यसले भोलीका दिनमा विद्युतिय सवारीसाधन चलाउन सहज हुने देखिन्छ ।