बिद्युत प्राधिकरणले खरिद गर्यो एकैपटक १५ वटा सुपरसोको ब्रान्डका इलेक्ट्रिक मोटरसाइकल

नेपाल बिद्युत प्राधिकरणले एकैपटक १५ वटा इलेक्ट्रिक मोटरसाइकल खरिद गरेको छ । यी मोटरसाइकललाई प्राधिकरणले टेन्डरमार्फत खरिद गरेको हो । डबल ब्याट्री जडान गरिएको यो मोटरसाइकल चीनीयाँ ब्रान्ड सुपरसोकोले उत्पादन गरेको टिएसएक्स मोडल हो ।

बिक्रेता कम्पनीले हिजो प्राधिकरण परिसरबाट हस्तान्तरण गरेको यो मोटरसाइकललाई प्राधिकरणका कर्मचारीहरुले प्रयोग गर्ने बताइएको छ । जसको मूल्य ३ लाख ६९ हजार ९ सय रुपैयाँ पर्छ । यसकै सिंगल ब्याट्रि जडान भएको मोटरसाइकललाई भने २ लाख ८५ हजार ९ सय रुपैयाँ पर्छ । नेपाली बजारमा यो मोटरसाइकललाई यसअघि भेस्पा र अप्रिलियाको समेत आधिकारिक बितरक रहिसकेको डि लाइफ स्टायलले कारोबार गर्दै आइरहेको छ ।

यो मोटरसाइकलमा ६० भोल्ट ३० एम्पियर आवर क्षमताको ब्याट्रि प्याक जडान गरिएको छ । ३ हजार वाट क्षमताको मोटर जडान गरिएको यो मोटरसाइकलले १४० एनएम टर्क जेनेरेट गर्ने दाबी गरिएको छ । साथै यसलाई एकपट फूल चार्ज गर्दा १६० किलोमिटरसम्म यात्रा गर्न सकिने बताइएको छ । यसलाई भिन्न ३ मोडमा चलाउन सकिन्छ ।

यसको उच्चतम गती ८० किलोमिटर प्रतिघन्टासम्म रहेको छ । यो मोटरसाइकलको दुबै चक्कामा डिस्क ब्रेक जडान गरिएको छ भने ग्राउन्ड क्लिरियन्स १ सय ९८ एनएम रहेको छ । बिभिन्न संघसंस्थाको रोजाइमा पर्न सफल यो ब्रान्डको स्कुटरलाई यसअघि वल्र्ड बैंकले समेत खरिद गरिसकेको कम्पनी स्रोतले बताएको छ ।