नासा नेपालको साधारण सभा सम्पन्न, प्रदेश संघ वागमतीले पायो एक्टिभ अवार्ड

काठमाडौं – नेपाल अटोमोवाइल्स एसोसिएसन (नासा नेपाल) को दशौ वार्षिक साधारण सभा हिजो ललितपुरमा सम्पन्न भयो । साधारण सभामा केन्द्रीय संघ, प्रदेश संघ, कमिसन तथा क्लव समेतका गरी ४४ जनाको सहभागिता रहेको नासा नेपालले जनाएको छ ।

साधारणसभामा गत बर्षको प्रगति प्रतिवेदन, लेखा परिक्षण प्रतिवेदन, अगामी कार्य योजना तथा समसामायिक प्रस्ताव गरी चार वटा प्रतिवदेन प्रस्तुत भयो, जसलाई सामान्य छलफल पश्चात पारित गरियो । त्यसैगरी आगामी वर्षको लागि अडिटर नियुक्ति, कार्यसमिति तथा कमिसनमा केही जिम्मेवारी हेरफेर, विशेष कार्यक्रमको घोषणा लगायतको कार्यसमेत साधारण सभाले गरेको छ ।

अध्यक्ष दशरथ रिसालको अध्यक्षतामा सम्पन्न सो साधारण सभामा कार्यकारी निर्देशक गोविन्द भट्टराई, सल्लाहकार ठाकुर प्रसाद न्यौपाने, उपाध्यक्ष अनिल कुमार वराल, सचिव महेश अधिकारी, कोषाध्यक्ष धान्यमणि नेपाल र इन्जिनियर गणशेखर श्रेष्ठले विभिन्न प्रस्ताव तथा प्रस्तुति गरेका थिए ।

संघमा आवद्ध प्रदेश संघ, क्लव तथा एसोसिएट मध्येबाट गत आ.व.मा सर्वाधिक सक्रिय वागमती अटोमोबाइल एसोसिएसन (प्रदेश संघ वागमती) लाई एक्टिभ अवार्ड प्रदान गरियो । प्रदेश संघ वागमतीका अध्यक्ष राजन पियाले सो अवार्ड ग्रहण गरे ।

साधारण सभामा १८ जना महानुभावहरूलाई विशिष्ट योगदान दिएवापत प्रशंसापत्र प्रदान गर्ने निर्णय भयो भने हिमालयन मोटरल्याण्डको स्थानान्तरण, गौरिटारको प्रस्तावित रेसिङ सर्किट र ई–स्पोर्ट्स, तथा पावर बोटिङमा जोड दिने जस्ता निर्णय समेत भएको छ ।

१८ बुँदे क्यालेण्डर, १० बुँदे सार्वजानिक प्रतिवद्धता जारी गरी सकिएको साधारण सभाले संघको इभेन्टको लागि प्रदेश संघ, क्लव र कमिसनलाई सम्पूर्ण जिम्मेवारी समेत दिएको बताइएको छ ।