नाइमाको समन्वयमा लक्ष्मी हुन्डाईले दियो ईभी सम्बन्धी प्राविधिक क्षमता अभिवृद्धि तालिम

काठमाडौं–लक्ष्मी हुन्डाईद्वारा आयोजित इलेक्ट्रिक सवारी प्रविधि, सुरक्षा तथा मर्मतसम्बन्धी प्राविधिक क्षमता अभिवृद्धि तालिम सम्पन्न भएको छ । नेपाल अटोमोबाइल इम्पोटर्स एन्ड म्यानुफ्याक्चरर्स एसोसिएसन(नाइमा) संगको समन्वयमा उक्त कार्यक्रम आयोजना गरिएको हो ।

कार्यक्रममा बोल्दै लक्ष्मी हुन्डाईका प्रबन्ध निर्देशक निराकार श्रेष्ठले सवारी क्षेत्रको विकसित प्रविधिसँगै दक्ष प्राविधिक जनशक्ति विकासको आवश्यकता बढ्दै गएको उल्लेख गरे । नाइमाले सीटीईभीटी तथा ट्राफिक प्रहरीसँगको सहकार्यमा क्षमता अभिवृद्धिका कार्यक्रमहरूलाई निरन्तरता दिँदै आएको उनले बताए ।

कार्यक्रमका विशेष अतिथि डीएसपी केशर न्यौपानेले सवारी क्षेत्र परिवर्तनको चरणमा रहेकाले प्राविधिक ज्ञान र सचेतना अभिवृद्धि अत्यावश्यक रहेको बताए ।

त्यसैगरी, प्रमुख अतिथि, बालाजु स्कूल अफ इन्जिनियरिङ एण्ड टेक्नोलोजीका प्रिन्सिपल सुशील श्रेष्ठले इलेक्ट्रिक सवारीसम्बन्धी विषयवस्तु वर्तमान बजार सन्दर्भमा अत्यन्त आवश्यक बन्दै गएको उल्लेख गरे । नाइमा सँगको सहकार्यबाट यो तालिम सफलतापूर्वक सञ्चालन हुन सकेको उनको भनाई थियो ।

तालिममा सीटीईभीटी बालाजु स्कूल अफ इन्जिनियरिङ एण्ड टेक्नोलोजीका १८ जना विद्यार्थी तथा काठमाडौं उपत्यका ट्राफिक प्रहरी कार्यालयका ७ जना ट्राफिक प्रहरीको सहभागिता रहेको थियो ।