सुरुङमार्ग निर्माणमा खटिएका १६ कामदारमा कोरोना संक्रमण, यस्तो छ सुरुङको प्रगति

 नागढुंगा–नौबिसे सुरुङमार्ग निर्माणमा खटिएका १६ जना कामदारमा कोरोना संक्रमण देखिएको छ । शुरुमा १ जनामा संक्रमण देखिए पनि कन्टयाक्ट ट्रेसिङ गर्दा थप १५ जनामा पोजेटिभ देखिएको आयोजनाले जनाएको छ ।

कामदारमा कोरोना देखिएपछि कार्यस्थलमै आइसोलेशन बनाएर राखिएको आयोजना प्रमुख नरेशमान शाक्यले बताए । उनका अनुसार अक्सिजन सिलिण्डरसहति आइशोलेशन वार्ड बनाइएको छ भने मेडिकल टिम समेत तयारी अवस्थामा राखिएको छ ।

१६ जनामा कामदारमा कोरोना देखिए पनि अन्य कामदारले निरन्तर काम गरिरहेको शाक्यले बताए ।

निषेधाज्ञाका बेला आवश्यक स्वास्थ्य मापदण्ड अपनाएर नागढुंगा–सिस्नेखोला सुरुङ निर्माणको काम जारी राखिएको छ । अहिले निर्माणस्थलमा ६५० जना कामदार छन् ।

१२/१२ घण्टाको दुई सिफ्ट गरेर सुरुङ खन्ने काम अघि बढाइएको नागढुंगा–सिस्नेखोला सुरुङ आयोजनाका निर्देशक शाक्यले जानकारी दिए । क्याम्पमा दैनिक ज्वरो नाप्ने, मास्क, सेनिटाइजर प्रयोग गर्नेलगायत सबै काम भएको उनको भनाइ छ ।

अहिले धादिङतिर मुख्य सुरुङ ६४ मिटर र आपत्कालीन उद्धार (स्केप्ट टनेल सुरुङ) ६७ मिटर खनिसकिएको छ । काठमाडौंतर्फ मुख्य सुरुङ ५० मिटर र आपत्कालीन सुरुङ १६६ मिटर खनिसकिएको छ । ‘अहिलेसम्म सबै गरेर मुख्य सुरुङ ११४ मिटर र आपत्कालीन सुरुङ २३३ मिटर खनिसकिएको छ,’ उनले भने ।

काठमाडौंतर्फ नै तीन वटा बक्स कल्भर्ट निर्माणको काम सकिएको छ । दुई वटा निर्माणाधीन छन् । सुरुङको मुखमा ओभरपास निर्माणको काम पनि भइरहेको छ । धादिङततर्फ पनि अन्डरपास निर्माण सुरु भएको शाक्यले जानकारी दिए । ‘धादिङतर्फ सुरुङको मुखमा अन्डरपास निर्माण गर्नुपर्छ,’ उनले भने, ‘यसको काम सकिसकेपछि चार ठाउँबाट सुरुङ खन्छौं ।’ अहिले तीन ठाउँबाट मात्र खनिएको छ । काठमाडौंमा २ र धादिङमा पालैपालो मुख्य र आपत्कालीन सुरुङ खन्ने गरिएको छ ।

जापानिज कम्पनी हाज्मा एन्डोले निर्माणको जिम्मा लिएको छ । २ दशमलव ६८ किलोमिटर दूरी रहने सुरुङ निर्माणका लागि जापानको साढे १६ अर्ब रुपैयाँ ऋण सहयोग छ । निर्माण ठेक्का भने साढे २२ अर्ब रुपैयाँको हो । यसमा ६ अर्ब रुपैयाँ नेपाल सरकारको छ ।