भाद्र २४ मा नाडाको विशेष साधारण सभा हुने, नाडा अब महासंघ बन्ने

काठमाडौं – आगामी भाद्र २४ गते नाडा अटोमोबाइल्स एसोसिएसन अफ नेपालको विशेष साधारण सभा हुने भएको छ । ललितपुरको झम्सिखेलस्थित द प्लाजामा हुने सो विशेष साधारण सभामा नाडालाई विधानतः महासंघमा लैजाने निर्णय हुनेछ ।

नाडाका महासचिव सुरेन्द्र कुमार उप्रेतीले एक विज्ञप्ति जारी गर्दै गत २०८२ भाद्र ८ गते बसेको नाडाको २१औं केन्द्रीय कार्यसमितिको बैठकले डेढ दशक लामो प्रतीक्षापछि नाडालाई विधानतः महासंघमा लैजाने निर्णय गरेको र त्यसैको निर्णयार्थ विशेष साधारण सभा बोलाउने निर्णय गरेको जानकारी गराएका छन् ।

स्वयम सदस्यहरूको लामो समयदेखिको इच्छा, चाहना र आकांक्षालाई मूर्तरूप दिन यस्तो निर्णय गरिएको र यसले नाडालाई वास्तविक रुपमै राष्ट्रिय स्तरको संस्था बनाउने तथा आफ्ना सदस्यहरूको हकहितको समेत समुचित रुपमा संरक्षण हुने भएकोले सबैलाई उपस्थितिका लागि अनुरोध समेत गरिएको नाडाको भनाइ छ ।