१० हजार ४०० डलरमै ३३० किलोमिटर रेन्ज दिने नयाँ कार, एडास फिचर पनि पाइने

चिनियाँ अटो निर्माता डोङफेङ अन्तर्गतको इलेक्ट्रिक भेइकल ब्राण्ड नामीले नयाँ इलेक्ट्रिक कार लन्च गरेको छ । नामी–०१ नामले आएको सो कम्प्याक्ट ईभीको मूल्य चीनमा १० हजार ४०० देखी १४ हजार ६०० डलरसम्म निर्धारण गरिएको छ । सो नयाँ ईभीलाई कम्पनीले दुई फरक ब्याट्री अप्सनमा ल्याएको हो ।

यसमा जडान भएको ३१.४५ किलोवाट लिथियम आयोन फस्फेट ब्याट्रीले ३३० किलोमिटर र ४२.३ किलोवाट आवरको ब्याट्री प्याक जडित मोडलले सिंगल चार्जमा ४३० किलोमिटर रेन्ज दिने दावी गरिएको छ । कारमा ७० किलोवाटको फ्रन्ट माउन्टेड पीएमएस मोटर दिइएको छ । डिसी फास्ट र एसी दुबै चार्ज सपोर्ट गने सो नयाँ कारलाई ८ मिनेट चार्ज गर्दा २०० किलोमिटर गुडाउन सकिन्छ ।

कारमा १२.८ इन्च लामो फ्लोटिङ सेन्ट्रल कन्ट्रोल स्क्रिन, ५ इन्चको एलसीडी इन्स्ट्रयुमेन्ट प्यानल, टु–स्पोक मल्टि फंक्सन स्टेरिङ ह्विल, ओटिए अपडेट, इन्टेलिजेन्ट भ्वाइस कन्ट्रोल, ३२ कलरको एम्विएन्ट लाइटिङ, मोबाइल फोन वायरलेस चार्जिङ लगायत फिचर दिइएको छ ।

साथै यसमा लेभल–टु एडास फिचर अन्तर्गत ब्लाइन्ट स्पट मनिटरिङ, अटोनोमस पार्किङ, रिमोट पार्किङ, फरवार्ड कोलिजन वार्निङ, लेन किपिङ एसिस्ट, ट्राफिक साइन रिकग्निसन र एडप्टिभ क्रुज कन्ट्रोल जस्ता फिचर सामेल गरिएको छ ।

५ जना यात्रुले आरामदायी यात्रा गर्न सकिने सो नयाँ कारलाई १४० किलोमिटर प्रतिघण्टाको उच्च गतिमा हाँक्न सकिने दावी छ ।