यी हुन् सन् २०२१ मा सबैभन्दा धेरै सर्च गरिएका इलेक्ट्रिक कार

सन् २०२१ मा इलेक्ट्रिक सवारी साधन बढी चर्चामा रहे । जसका कारण यो वर्ष इलेक्ट्रिक सवारी इन्टरनेटमा बढी सर्च गरियो । यद्यपि इलेक्ट्रिक कारको तुलनामा आईसीई इन्जिन भएका कारको खोजी अझै ठूलो अन्तरमा बढी नै हुने गरेको छ ।

यो वर्ष सबैभन्दा बढी टाटा नेक्सन इन्टरनेटमा सर्च गरियो । यो वर्ष हरेक महिना १ लाख ३५ हजार पटक इन्टरनेटमा यसको खोजी गरियो । इन्टरनेटमा बढि खोजी गरिएका इलेक्ट्रिक कारहरु यस्ता छन् ।

१. टाटा नेक्सन ईभी
टाटा नेक्सन ईभी १ लाख ३५ हजार पटक इन्टरनेटमा सर्च गरियो र यो सूचीको शीर्ष स्थानमा छ । सो कार सबैभन्दा बढी बिक्री हुने इलेक्ट्रिक एसयूभी हो जसले एक पटक चार्जमा ३१२ किलोमिटरको रेन्ज प्रदान गर्छ । सो कार फास्ट चार्जरबाट ६० मिनेटमा ० देखि ८० प्रतिशतसम्म चार्ज गर्न सकिन्छ । जबकि घरको सामान्य चार्जरबाट ८ घन्टामा फुल चार्ज गर्न सकिन्छ । टाटा नेक्सनमा ३०१२ केडब्ल्युएचको ब्याट्री जडान गरिएको छ ।

२. टाटा टिगोर ईभी
टाटा टिगोर ईभी यो सूचीमा दोस्रो स्थानमा रहेको छ । सो कार प्रति महिना ७४ हजार पटक इन्टरनेटमा सर्च गरियो । नयाँ टाटा टिगोर ईभीले फुल चार्जमा ३०६ किलोमिटरको ड्राइभ रेन्ज प्रदान गर्छ । नयाँ टिगोर ईभीमा आईपी६७ रेटिङको २६ केडब्ल्युएच लिथियम आयोन ब्याट्री समावेश गरिएको छ । यसको इलेक्ट्रिक मोटरले ५५ किलोवाट पावर र १७० एनएम टर्क जेनेरेट गर्न सक्षम छ ।

३. एमजी जेडएस ईभी
एमजी जेडएस ईभी ६० हजार ५० पटक सर्च गरी तेस्रो स्थानमा रहेको छ । सो इलेक्ट्रिक एसयूभीमा ४४.५ केडब्ल्युएचको आईपी६ प्रमाणित ब्याट्री जडान गरिएको छ, जुन पूर्ण चार्ज हुन ६ देखि ८ घन्टाको समय लाग्छ । सिंगल चार्जमा सो कारले ४१९ किलोमिटरको ड्राइभिङ रेन्ज प्रदान गर्छ । सो कारले ८ सेकेन्डमा ० देखि १०० किलोमिटर प्रतिघन्टाको गति लिने क्षमता रहेको छ । कारमा तीनवटा ड्राइभिङ मोडसहितको रिजेनेरेटिभ ब्रेकिङ सिस्टम उपलब्ध छ ।

४. औडी ई–ट्रोन
सो कार गत वर्ष २७ हजार एक सय पटक इन्टरनेटमा सर्च गरियो । औडी ई–ट्रोनमा ९५ केडब्ल्युएचको लिथियम आयोन ब्याट्री प्रयोग गरिएको छ, जसले कारलाई अधिकतम ४०० किलोमिटरको रेन्ज प्रदान गर्छ । साथै सो कार मात्र ३० मिनेटमा ८० प्रतिशतसम्म चार्ज गर्न सकिन्छ । कारको टप स्पिड २०० किलोमिटर प्रति घन्टा रहेको छ ।

५. ज्यागुअर आई–पेस
यो सूचीमा ज्यागुअर आई–पेस पाँचौं स्थानमा रहेको छ । ज्यागुअर आई–पेस तीन भेरिएन्ट एस, एसई र एचएसईमा लन्च गरिएको छ । ज्यागुअर आई–पेसको इलेक्ट्रिक मोटरले ३५९ बीएचपीको पावर र ६९६ न्युटन मिटर टर्क जेनेरेट गर्छ । कारमा ४–ह्वील स्ट्यान्डर्डका रूपमा ड्राइभ दिइएको छ । यो कारले ४.८ सेकेन्डमा ० देखि १०० किलोमिटर प्रतिघन्टाको गति प्रदान गर्छ । फुल चार्जमा सो कारले ४८० किलोमिटरको रेन्ज प्रदान गर्छ ।

६. हुन्डाई कोना इलेक्ट्रिक
हुन्डाई कोना इलेक्ट्रिक गत वर्ष २२ हजार २०० पटक खोजिएको छ । यो इलेक्ट्रिक एसयूभी दुई वर्षअघि सार्वजनिक भएको थियो । सो इलेक्ट्रिक एसयूभी एक पटक चार्जमा ४५२ किलोमिटरको रेन्ज प्रदान गर्छ र ९.७ सेकेन्डमा ० देखि १०० किमी÷घन्टाको गति लिन सक्छ ।

७. महिन्द्रा ई–भेरिटो
महिन्द्रा ई–भेरिटो गत वर्ष ८ हजार एक सय पटक सर्च गरिएको इलेक्ट्रिक कार हो । सामान्य ग्राहकहरु माझ यो त्यति सफल भएन तर यसलाई ट्याक्सीको रुपमा व्यापक रुपमा प्रयोग गरिएको छ ।

हुन त विश्व बजारमा अन्य धेरै ब्रान्डका इलेक्टिक कारहरु समेत उपलब्ध छन् । तर नेपाली बजार भारतीय बजारबाट प्रभावित हुने भएकाले हामीले यो भारतीय बजारमा गरिएको सर्चलाई आधार मानेका हौ । माथि उल्लिखित इलेक्टिक कार मध्ये हाल नेपाली बजारमा टाटा नेक्सन र एमजी जेडएस ईभी तथा हुन्डाई कोना इलेक्टिक उपलब्ध छन् ।