२०२१ मा लन्च भए सर्बाधिक माइलेज दिने यी ५ कार, ३ वटा नेपाल आउन बाँकी

सन् २०२१ मा भारतमा बिभिन्न अटो उत्पादक कम्पनीहरुले नयाँनयाँ मोडलका कारहरु सार्बजनिक गरे । यी मध्ये कतिपय कारहरु लुक्स तथा डिजाइन, पावर तथा पर्फमेन्स र हाइटेक फिचरका कारण चर्चामा रहन सफल भए । जसमध्ये मारुती सजुकीको नयाँ सेलेरियो, मारुतीकै स्विफ्ट फेसलिफ्ट, रेनो काइगर, हुन्डाई आई२० एनलाइन र टाटा पन्च भने सर्बाधिक माइलेज दिने कारका रुपमा समेत बढी चर्चित बने ।

अटोमोटिभ रिसर्च एसोसिएसन अफ इन्डिया (एआरएआई) ले गरेको परिक्षणका आधारमा यो बर्ष लन्च भएको सबैभन्दा बढी माइलेज दिने कारका रुपमा मारुती सुजुकीको नयाँ सेलेरियो पहिलो स्थानमा रहन सफल भएको छ । यो कारले प्रतिलिटर इन्धन खपतमा २६.६८ किलोमिटर माइलेज दिने दाबी गरिएको छ ।

भारतमा अघिल्लो महिना लन्च गरिएको यो कारमा १.० लिटर क्षमताको पेट्रोल इन्जिन जडान गरिएको छ । जसको अधिकतम पावर ६६.६ पिएस रहेको छ । यो कार नेपाल आउने अन्तिम तयारीमा रहेको भन्दै आधिकारिक बितरक सिजी मोटोकर्पले बुकिङ खुल्ला समेत गरिसकेको छ ।

यसै बर्षको मार्च महिनामा सार्बजनिक गरिएको स्विफ्ट फेसलिफ्टले २३.७६ किलोमिटर माइलेज प्रदान गर्ने दाबी गरिएको छ । सुजुकीको निकै नै लोकप्रिय यो ह्याचब्याक कार अहिले नेपाली बजारमा समेत उपलब्ध रहँदै आएको छ । १.२ लिटर क्षमताको पेट्रोल इन्जिन जडान गरिएको यो कारको अधिकतम पवार भने ९० पिएस रहेको छ ।

रेनोको सब–फोर मिटर एसयुभी काइगरले २०.५३ किलोमिटर माइलेज दिने दाबी गरिएको छ । १.० लिटर क्षमताको पेट्रोल र टर्बो पेट्रोल दुबै इन्जिन अप्सनमा उपलब्ध यो एसयुभी हाल नेपाली बजारमा समेत उपलब्ध रहँदै आएको छ । यसको टर्बो पेट्रोलले १०० पिएस र नन् टर्बोले ७२ पिएस पावर दिने बताइएको छ ।

त्यसैगरी हुन्डाईको आई२० एनलाइन १.० टर्बो पेट्रोलले २०.२५ किलोमिटर र टाट पन्चले १८.९७ किलोमिटर माइलेज प्रदान गर्ने दाबी गरिएको छ ।

पछिल्ला यी दुबै कार नेपाली बजारमा उपलब्ध भैसकेका छैनन् । आधिकारिक बितरक सिप्रद्धी ट्रेडिङले टाटा पन्चलाई छिट्टै सार्बजनिक गर्ने भनेपनि हुन्डाई आई२० एनलाइन कहिले नेपाल आउँछ भन्ने बिषयमा कुनै टुंगो लागिसकेको छैन । यी मध्ये आई२० एनलाइन १.० टर्बो पेट्रोलको अधिकतम पवार १२० पिएस र टाटा पन्च १.२ पेट्रोलको ८६ पिएस रहेको छ ।