नेक्सन ईभी लिन अझै करिव ६ महिना पर्खिनु पर्ने, पहिलो १०० ग्राहकले पाए पुरानै मूल्यमा गाडी

काठमाडौं – नेपाली बजारमा टाटाको इलेक्ट्रिक कार नेक्सन ईभी बिक्री–वितरण गरिरहेको सिप्रदी ट्रेडिङ प्रालिले ग्राहकलाई आवश्यक संख्यामा गाडी डेलिभरी गर्न सकेको छैन । धेरै ग्राहकको माग भए तापनि अहिलेको अवस्थामा यो गाडी लिनका लागि ग्राहकले अझै करिव ६ महिना भन्दा बढी नै कुर्नु पर्ने कम्पनी स्रोतले जनाएको छ ।

सिप्रदी ट्रेडिङले सुरुवाती मूल्यमा १०० ग्राहकलाई गाडी डेलिभरी समेत गरिसकेको छ । अक्टोबर ४ अर्थात असोज १८ सम्म बुकिङ गरेका ग्राहकले पुरानै मूल्यमा गाडी पाए भने त्यसपछि सबै भेरिएन्टमा १ लाख रुपैयाँ मूल्य समेत बढेको छ ।

हाल टाटा नेक्सन ईभी एक्सएम, एक्सजेड प्लस र एक्सजेड प्लस लक्जरी गरी तीन भेरिएन्टमा उपलब्ध छ । यसको मूल्य क्रमशः ३६ लाख ९९ हजार, ३८ लाख ९९ हजार र ४० लाख ९९ हजार रुपैयाँ छ ।

पछिल्लो समयमा नेपाली बजारमा पहिले भन्दा अलि धेरै गाडी आयात भइरहेको र अब विस्तारै ग्राहकले गाडी डेलिभरीका लागि पर्खिने समय अर्थात वेटिङ पिरियड पनि कम हुँदै जाने विश्वास गरिएको कम्पनीको भनाइ छ ।

सब कम्प्याक्ट एसयूभी नेक्सन ईभीको सबैभन्दा आकर्षक फिचर भनेको यसको २०५ एमएमको उच्चतम ग्राउन्ड क्लियरेन्स हो । जुन नेपाली सडकका लागि उपयुक्त छ । त्यसैगरी यसमा टाटाको जिपट्रोन प्लेटफर्ममा बनेको ३०.२ किलोवाट आवर क्षमताको लिथियम आयोन ब्याट्री जडान गरिएको छ । यसमा ९५ किलोवाट क्षमताको इलेक्ट्रिक मोटर दिइएको छ । एक पटकको फुल चार्जमा ३ सय किलोमिटर हाराहारी यात्रा गर्न सकिने विशेषताका कारण समेत यो एसयूभीको चर्चा चुलिंदो छ ।

अत्याधुनिक जिपट्रोन प्रविधियुक्त नेक्सन ईभीको बनावट आकर्षक छ भने यसमा अन्त्यन्त सुरक्षित एवं आरामदायी तवरले यात्रा गर्न सकिन्छ । त्यसैगरि लामो दुरीको यात्रा पनि सहजताका साथ गर्न सकिने नेक्सनको ब्याट्रीको आयु लामो हुनुको साथै यसलाई आफ्नै घरमा चार्ज गर्न सकिन्छ ।