सय भन्दा बढी ब्रान्डका ‘ब्रेक शु’ बिक्री हुन्छन् नेपालमा, कस्तो छ बजार ?

नेपाली बजारमा सय भन्दा बढी ब्रान्डका ब्रेक शु उपलब्ध छन् । दुई पांग्रे र चार पांग्रे सवारी साधनमा लाग्ने ब्रेक शु नेपाली बजारमा पाइन्छन् । नेपाली बजारमा उपलब्ध हुने ब्रेक शु अधिकांश रुपमा भारतीय र त्यसपछि चाइनिज ब्रान्डका छन् । अन्य देशबाट उपलब्ध हुने ब्रेक शु कमै मात्रामा पाइन्छन् ।

नेपाली बजारमा विभिन्न कम्पनीहरुले आधिकारिक वितरकको रुपमा ब्रेक शु आयात गरिरहेका छन् । दुई पांग्रे र चार पांग्रेका लागि उपयुक्त हुने ब्रेक शुको रुपमा सत्यदीप इन्टरनेसनलले एमके, एसडीआई अटोमोबाइल्सले सेरेडो र कम्पो, श्री एसटीसीले एएसके, भावना बिजनेस लिंकले राने, महावीर अटोमोबाइल्सले टीभीएस, ग्लोबल एजेन्सीले मेरिटोर, रिता अटोमोबाइल्सले रिब्को आदि ब्रान्डका ब्रेक शु बिक्री–वितरण गर्दै आएका छन् ।

यद्यपि नेपाली बजारमा सयौं ब्रान्डका ब्रेक शु उपलब्ध छन् । सबैले आफ्नो ब्रान्ड भनेर बिक्री गर्ने गरेको पाइन्छ । टीभीएस, महिन्द्रा, टाटा जस्ता प्रतिष्ठित कम्पनीकै ब्रान्डमा समेत ब्रेक शु उपलब्ध हुने गरेका छन् ।

नाडा अटोमोबाइल्स एसोसिएसन अफ नेपालका उपाध्यक्ष तथा अटो पार्ट्स व्यवसायी सुनिल रिजालले अधिकांश ब्रेक शुमा भारतीय ब्रान्ड नै प्रचलित भए पनि पछिल्लो समयमा चाइनिज ब्रान्ड समेत बढ्दै गएको बताउछन् । दुई पांग्रे र चार पांग्रे कमर्सियल सवारी साधनमा चाइनिज ब्रेक शु समेत नेपाली बजारमा बढ्दै गएको उनको भनाइ छ ।

सत्यदीप इन्टरनेसनलका म्यानेजिङ डाइरेक्टर दिपेन्द्र कुमार मिश्रका अनुसार अधिकांश ब्रेक शु भारतीय कम्पनीका प्रयोग हुन्छन् भने केही मात्रामा चीनबाट समेत आउछन् ।

अन्य देशबाट भने नगन्य मात्रामा ब्रेक शु आयात भएको पाइन्छ । त्यसैले दुबई वा अन्य देशका ब्रेक शु नेपालमा त्यस्तो धेरै प्रयोग भएको पाइदैन ।

व्यवसायीहरुका अनुसार ब्रेक शु र ब्रेक प्याडको संयोजनबाट सवारी साधनमा घर्षण कम गराउने कार्य गरिन्छ । त्यही घर्षण हुने स्थानमा सेरामिक मेटलको प्रयोग गरिन्छ । त्यही स्थानमा प्रयोग गरिने फलामले घर्षण कम गराउन सहयोग गर्छ । सो स्थानमा हाल फलामको सट्टा सुन प्रयोग गरिएको र सुनलाई कालो बनाएर राखिएको बताइन्छ ।

व्यवसायी सुनिल रिजाल नेपालमा बिक्री हुने ब्रेक शुको यकिन तथ्यांक नभए पनि वार्षिक रुपमा २ अर्ब भन्दा बढी रकमको ब्रेक शु कारोबार हुने अनुमान गर्छन् ।

पछिल्लो समयमा ब्रेक शुभित्र सुन लुकाएर ल्याइएको र यसको तौलबारेमा व्यापक चर्चा भइरहेको छ । यो अवस्थामा नेपाली बजारमा उपलब्ध हुने ब्रेक शुको वारेमा समेत जान्नु आवश्यक छ ।