बजेटको फाइदा सबैभन्दा बढी हुन्डाई र टेस्लालाई, २० लाख हाराहारी मूल्य घट्ने अनुमान

हालै सार्वजनिक गरिएको नयाँ बजेटले १०० किलोवाट देखि २०० किलोवाट सम्म क्षमताका विद्युतीय गाडीको कर घटाएसँगै ती गाडीको वारेमा समेत चर्चा शुरु भएको छ ।

१०० किलोवाटदेखि २०० किलोवाटसम्म विद्युतीय मोटर जडित कारमा यसअघि ३० प्रतिशत रहेको भन्सार दरलाई २० प्रतिशत कायम गरिएको छ। त्यस्तै सोही मोटर क्षमता भएको विद्युतीय कारमा ३० प्रतिशत नै रहेको अन्तःशुल्क २० प्रतिशतमा सीमित गरिएको छ।

यस अनुसार यो सेगमेन्टका इलेक्ट्रिक कार आयात गर्दा समग्रमा २० प्रतिशत कम कर तिर्नु पर्नेछ । यसको प्रत्यक्ष असर मूल्यमा समेत पर्नेछ र फाइदा भनेको उपभोक्तालाई हुनेछ ।

आयोनिक ५, एमजी जेडएस ईभी लङ रेन्ज, १५० किलोवाटको बीवाईडी एट्टो ३ आदि गाडीको मूल्य घट्ने छ । यी गाडीमा १०० देखि २०० किलोवाट बीचको क्षमताका मोटर छन् । यस अनुसार बढीमा २० लाख हाराहारी मूल्य घट्ने अनुमान गर्न सकिन्छ ।

त्यसैगरी २०० देखि ३०० किलोवाट क्षमताका गाडीमा अब ४५ प्रतिशत भन्सार र ४० प्रतिशत अन्तःशुल्क लाग्ने भएको छ । पहिले ४५ प्रतिशत भएको अन्तःशुल्कलाई ५ प्रतिशत घटाएर ४० प्रतिशत पुगेको हो ।

यस अनुसार टेस्ला मोडल ३ जस्ता इलेक्ट्रिक कारको मूल्यमा यसको प्रत्यक्ष असर पुग्ने छ । मोडल ३ स्ट्यान्डर्ड प्लसको १ करोड ४५ लाख रुपैयाँ मूल्य पर्छ । यसका आधारमा यसको मूल्य पनि त्यही अनुसार घट्ने छ ।