ओरेन्ज कलरमा आकर्षक एमजी ४ इलेक्ट्रिक ह्याचब्याक, परीक्षणमै चर्चा (फोटोफिचर)

नेपालमा केही समय पछि एमजीको नयाँ इलेक्ट्रिक ह्याचब्याक एमजी ४ उपलब्ध हुने भएको छ । त्यो भन्दा पहिले नेपालका लागि आधिकारिक बिक्रेता पारामाउन्ट मोटर्सले परीक्षणका लागि सो इलेक्ट्रिक ह्याचब्याक ल्याएको छ । आकर्षक ओरेन्ज कलरमा उपलब्ध सो नयाँ कार अहिले चर्चामा छ ।

हाल परीक्षणका लागि ल्याइएको एमजी ४ मा ९९ किलोवाटको मोटर छ भने ५१ किलोवाट आवरको ब्याट्री छ । यसमा भएको ब्याट्रीलाई ४ घण्टामा फुल चार्ज गर्न सकिन्छ र सिंगल चार्जमा ३२० किलोमिटर रेन्ज दिन्छ ।

एमजीले नेपाली बजारमा पहिले देखि नै जेडएस ईभी उपलब्ध गराइरहेको छ । यद्यपि एमजी जेडएस इलेक्ट्रिक मात्र नभई पेट्रोलियम भर्सनमा समेत उपलब्ध छ । तर एमजी ४ कम्पनीको पहिलो फुल्ली इलेक्ट्रिक प्लेटफर्ममा बनेको सवारी साधन समेत हो । त्यसैगरी यसमा ब्याकह्विल ड्राइभ छ ।

आकर्षक ओरेन्ज कलर र हेर्दा ल्याम्बोर्गिनी कार जस्तो देखिने स्पोर्टी स्टाइलको एमजी ४ मा भएका आकर्षक प्रोजेक्टर हेडल्याम्प र भर्टिकल साइड लाइटले झन आकर्षक बनाएको छ । ब्ल्याक कलर समेत मिसिएको टु टोन फिनिस जस्तो पनि यसमा देखिन्छ ।

३६० डिग्री क्यामेरा, सेन्सर, ६ एयरब्याग, सिटबेल्ट, अटो होल्ड, हिल असिस्ट लगायतका विभिन्न विशेषता यसमा छन् । विभिन्न ५ ड्राइभ मोडमा चलाउन सकिने एमजी ४ को इन्टेरियरमा ७ इन्चको इन्स्ट्रयुमेन्ट क्लस्टर, १० इन्चको टचस्क्रिन इन्फोटेनमेन्ट सिस्टम लगायतका विभिन्न सुविधा उपलब्ध छन् ।

एमजी–४ ५१ र ६४ किलोवाट आवर गरी दुइ ब्याट्री प्याकमा नेपाल आउन लागेको हो । जसमध्ये ५१ किलोवाटको ४८ लाख र ६४ किलोवाटको ५६ लाख रुपैयाँ मूल्य निर्धारण हुनसक्ने कम्पनी स्रोतको भनाइ छ ।