भारतमा लन्च भयो अपडेटेड एमजी जेडएस ईभी, नेपालमा पनि छिट्टै आउने

भारतमा एमजी मोटर इन्डियाले इलेक्ट्रिक एसयूभी एमजी जेडएस ईभीको फेसलिफ्ट मोडल लन्च गरेको छ । दुई ट्रिममा उपलब्ध सो गाडीको मूल्य २० लाख ९९ हजार र २४ लाख १८ हजार भारु तोकिएको छ ।

भारतमा सबैभन्दा पहिले सन् २०२० को प्रारम्भमा लन्च गरिएको सो इलेक्ट्रिक एसयूभी भारतमा टाटा नेक्सन पश्चात सबैभन्दा धेरै बिक्री हुने इलेक्ट्रिक एसयूभी मानिन्छ । यो युरो एनक्याप क्र्यास टेस्टमा फाइभ स्टार पाउन सफल सबैभन्दा सुरक्षित कारमध्ये एक पनि हो ।

एमजीले सो इलेक्ट्रिक एसयूभीलाई अझै दमदार बनाउन चाहेको र यसैका कारण नै थप अपडेट गरेको बताएको छ ।

एमजी जेडएस ईभीको एक्साइट भेरिएन्टमा चमकदार लोगो, फ्रन्ट र रियरमा सिटबेल्ट रिमाइन्डरका साथै २०.३२ सेमी टचस्क्रिन इन्फोटेनमेन्ट सिस्टम दिइएको छ । यसलाई एप्पल कारप्ले र एन्ड्रोइड अटोका साथ जोडिएको छ । यसमा ६ एयरब्याग छन् ।

एक्सक्लसिभ ट्रिममा कनेक्टेड कार टेक्नोलोजी, ड्युअल प्यानल प्यानोरामिक सनरुफ, पीएम २.५ फिल्टर, लेदर सिट, इलेक्ट्रो–फोल्डेबल विङ मिरर, हिटेड ओआरभीएम, रेन सेन्सिङ वाइपर, सिक्स–वे पावर एड्जस्टेबल ड्राइभर सिट आदि सुविधा छ । कारमा भएको नयाँ आईस्मार्ट सिस्टमले सुविधालाई सपोर्ट गर्छ ।

एमजीको यो इलेक्ट्रिक गाडीमा ४४.५ किलोवाट आवरको ब्याट्री प्याकका साथ सिंक्रोनस मोटर उपलब्ध छ । यसलाई एक पटक फुल चार्ज गर्दा ४१९ किलोमिटर अनुमानित रेन्ज दिने किसिमले अपग्रेड गरिएको छ । यो भन्दा पहिले देखि उपलब्ध मोडलको रेन्ज ३४० किलोमिटर थियो ।

उक्त मोटरले १४२ बीएचपी पावर र ३५३ एनएम टर्क जेनेरेट गर्छ । कारमा टायर प्रेसर मोनिटरिङ सिस्टम, प्रोजेक्टर हेडल्याम्प र एलईडी डेटाइम रनिङ लाइट आदि उपलब्ध छन् । यसको ग्राउन्ड क्लियरेन्स १७७ एमएम छ ।

नेपाली बजारमा पारामाउन्ट मोटर्सले पहिले देखि नै एमजी जेडएस ईभी बिक्री–वितरण गरिरहेको छ । पछि नेपाली बजारमा विभिन्न करका दरमा गरिएको वृद्धिका कारण यसको बिक्री गर्न र किन्न समेत ग्राहकहरु इच्छुक नदेखिएको अवस्था थियो ।

अब अपग्रेड गरिएको एमजी जेडएस ईभी पनि नेपाली बजारमा छिट्टै नै उपलब्ध हुने पारामाउन्ट मोटर्सले जनाएको छ ।