एमजीको नयाँ इलेक्ट्रिक कार : रेन्ज ४५० किलोमिटर, प्रतिस्पर्धा फक्सवागन आइडी३ संग

एमजी मोटर्सले नयाँ इलेक्ट्रिक ह्याचव्याक कार एमजी४ सार्वजनिक गरेको छ । यो नयाँ कारलाई कम्पनीले पहिले युरोप हुँदै विस्तारै विश्वका अन्य राष्ट्रमा बिक्री गर्ने योजना बनाएको छ । युरोपमा यसले फक्सवागन आईडी३ सिंग सिधा प्रतिस्पर्धा गर्नेछ भने अन्य केही राष्ट्रमा किया निरो इभीसंग समेत प्रतिस्पर्धा हुनसक्ने अनुमान लगाइएको छ ।

चीनीयाँ अटो उत्पादक एसएआइसी अन्तर्गतको ब्रान्ड भएका कारण यो नयाँ कारमा कम्पनीले सोही उत्पादक कम्पनीले विकास गरेको मोडुलर स्कालेवल प्लेटफर्मममा यो नयाँ कारलाई निर्माण गर्न लागेको हो । यो नयाँ कारमा ५१ र ६४ किलोवाट आवर क्षमताको व्याट्री प्याक जडान हुने भएको छ । जसलाई एकपटक फुल चार्ज गर्दा ४५० किलोमिटरसम्म गुडाउन सकिने दावी गरिएको छ ।

युरोपियन बजारमा यसको सिंगल मोटर रियल ह्विल ड्राइभ र डुअल मोटर फोर ह्विल ड्राइभ गरी कुल २ भेरियन्ट उपलब्ध हुनेछ । जसमध्ये सिंगल मोटर भएको भेरियन्टमा ५१ किलोवाट आवर क्षमताका व्याट्री प्याक जडान गरिनेछ । यो भेरियन्टको अधिकतम पावर १६७ एचपी र रेन्ज ३५० किलोमिटर रहने दावी छ ।

यसैगरी डुअल मोटर जडान हुने अर्को भेरियन्टमा ६४ किलोवाट अवार क्षमताको व्याट्री प्याक जडान हुने जनाइएको छ । यो कारको अधिकतम पावर २०१ एचपी र रेन्ज ४५० किलोरिमटर रहने दावी गरिएको छ । यो कारलाई १६० किलोमिटर प्रतिघण्टको गतिमा हाँक्न सकिनेछ ।