एमजीले बढायो चार्जिङ स्टेशनको संख्या, डिसी चार्जर नराखेको भन्दै ग्राहक बने आक्रोशित

एमजी मोटर्सको नेपालका लागि आधिकारिक बितरक पारामाउन्ट मोटर्सले देशका बिभिन्न स्थानहरुमा चार्जिङ प्वाइन्ट बिस्तार गरेको छ । पछिल्लो समय उसले बिर्तामोड, बिराटनगर, चीतवन, ढल्केबर, बर्दिबास, पोखरा, मुलकोट, बुटवल र बिरगंजमा यस्ता प्वाइन्ट बिस्तार गरेको हो ।

जसमध्ये बिर्तामोड, बिराटनगर, चीतवन, पोखरा र बुटवलमा कम्पनीको आफ्नै डिलरले चार्जिङ प्वाइन्ट संचालन गरेका हुन भने ढल्केबर, बर्दिबास, मुलकोट र बिरगंजमा स्थानिय होटल तथा रिसोर्टमा यस्ता प्वाइन्ट राखिएका छन् । त्यसैगरी चीतवन र पोखरामा भने डिलर बाहेक अन्य ४ स्थानमा समेत चार्जिङ प्वाइन्ट बिस्तार गरेको छ । चीतवनको रोयल सेन्चुरी होटल र ल्यान्डमार्क फरेस्ट पार्क तथा पोखराको होटल ल्यान्डमार्क र टेम्पल ट्रि रिसोर्टमा यस्ता प्वाइन्ट बिस्तार गरिएको हो ।

कम्पनीले बिस्तार गरेको यी सबै चार्जिङ स्टेशनमा एसि चार्जर राखिएको छ । नेपाली बजारमा सर्बाधिक बिक्री हुने इलेक्ट्रिक कारका रुपमा परिचित एमजी जेडएस इभीका ग्राहक एबं सामाजिक संजाल प्रयोगकर्ताहरु भने कम्पनीले बिस्तार गरेको यी चार्जिङ स्टेशनबाट सन्तुष्ट देखिएका छैनन् । ग्राहकलाई सुबिधा प्रदान गर्न डिसी चार्जर राख्नुपर्नेमा कम्पनीले संख्या बढाउनमात्र केन्द्रित भई एसी चार्जिङ राखेको भन्दै उनीहरुले आक्रोश ब्यक्त गरेका हुन् ।

एमजी मोटर्सको आधिकारिक फेसबुक पेज मोरिस ग्यारेज नेपालमा प्रतिक्रिया ब्यक्त गर्दै उनीहरुले कम्पनीले ग्राहकको भावनामाथी खेलवाड गरेको बताउँदै आक्रोश ब्यक्त गरेका हुन् । ‘७ किलोवाटको चार्जर राखेर ग्राहकलाई मुर्ख नबनाउँ । तत्काल डिसी चार्जरको ब्यवस्था गर, अन्यथा ग्राहकको धैर्यता टुट्नेछ’ पबिन थापाले प्रतिक्रिया जनाएका छन् ।

सरोज रिजाल लेख्छन, ‘चार्जिङ प्वाइन्टको संख्या मात्र बढाएर ग्राहकको आँखामा छारो हाल्ने काम रोक्नुपर्छ । तत्काल डिसी चार्जर राख्न कम्पनीले पहल गर्नुपर्छ ।’

सन्जु नायकले लामो प्रतिक्रिया जनाउँदै लेखेका छन्,‘यो कम्पनीका लागी सबैभन्दा ठूलो मार्केटिङ भुल हुनेछ । डिसी चार्जर राख्न सकिंदैन भने यसको जवाफ चाहियो । अन्यथा कुकुर र बिरालोको जस्तो खेल खेलेर हामीजस्ता ग्राहकलाई कहिलेसम्म अन्योलमा राख्ने, यसतर्फ कम्पनीको ध्यान जाओस ।’ उनले एमजीको इलेक्ट्रिक कार आफैमा राम्रो भएपनि कम्पनीले बिक्री पछिको सेवामा उचित ध्यान पु¥याउन नसकेको आरोप लगाएका छन् । उनी लेख्छन, ‘ अन्य साना बिक्रेताहरुले समेत डिसी चार्जर राख्न थालिसकेको अबस्थामा सबैभन्दा बढी इलेक्ट्रिक कार बिक्री गर्ने एमजीले एसी चार्जरमा मात्र जोड दिनु आफैमा लाजमर्दो बिषय हो । यस बिषयमा ग्राहकहरु सचेत हुनु जरुरी छ ।’

यसरी प्रतिक्रिया जनाउने अधिकांशले नाफामा मात्र केन्द्रित नभई छिटो भन्दा छिटो डिसी चार्जर राखेर ग्राहकलाई चित्तबुझ्दो सेवा प्रदान गर्न बिक्रेता कम्पनीलाई आह्वान गरेका छन