यस्तो छ नेपालमा बिक्री शुरु हुन लागेको इलेक्ट्रिक क्रसओभर एमजी–४ (मूल्य र फिचर सहित)

एमजी मोटर्सको नेपालका लागि आधिकारिक वितरक पारामाउन्ट मोटर्सले अर्को नयाँ इलेक्ट्रिक कार बिक्री शुरु गर्न लागेको छ । सो ब्रान्डको चर्चित क्रसओभर एमजी–४ अहिले नेपाल आउने क्रममा रहेको र अवको केहीदिन पछि सोरुममा उपलब्ध हुने कम्पनी स्रोतले बताएको छ । पारमामाउन्टले हाल एमजी जेडएस ईभी बिक्री गर्दै आएको छ ।

एमजी–४ ५१ र ६४ किलोवाट आवर ब्याट्री प्याकमा नेपाल आउन लागेको हो । जसमध्ये ५१ किलोवाटको ४८ लाख र ६४ किलोवाटको ५६ लाख रुपैयाँ निर्धारण हुनसक्ने कम्पनी स्रोतको भनाई छ । यी कारको रेन्ज क्रमशः ३५० र ४५२ किलोमिटर दावी गरिएको छ । दुवै भेरिएन्टमा ९९ किलोवाट क्षमताको मोटर जडान गरिएको छ । २५० किलोवाट सम्मको डीसी चार्जर सपोर्ट गर्नसक्ने यसको टर्क २५० एनएम रहेको छ ।

सो इलेक्ट्रिक क्रसओभरको वाहिरी लुक्स निकै नै आकर्षक र स्पोर्टी रहेको छ । यसमा दिइएको डुअल–विंग स्पोइलर र फुल–वाइड एलइडी टेल ल्याम्पको साथै एङ्गुलर हेड ल्याम्प र डुअल टोन बम्परको साथमा स्लोपीङ बोनेटले कारको वाहिरी लुक्समा निखार दिएको छ ।

एमजी–४ को ड्यासवोर्ड स्लिक रहेको छ, जहाँ दुईवटा फ्लोटिङ स्क्रिन पाउन सकिन्छ । सो कारमा वायरलेस चार्जिङ प्याड, ३६० डिग्री क्यामेरा, भेन्टिलेटेड फ्रन्ट सीट र एडिएसएस फिचर लगायत पाउन सकिन्छ ।

२०२२ को जुलाईमा ग्लोवल लन्च गरिएको एमजी–४ ठिक एक वर्षपछि नेपाल आउन लागेको हो । सो कारको सिधा प्रतिस्पर्धा टाटा नेक्सन र बीवाइडी एट्टो–३ को एड्भान्स भेरिएन्टसंग हुने देखिएको छ ।