नाइमा एक्सपोमार्फत अर्को ईभी भ्यान भित्रिदै नेपाल, जारी भयो कौतहलतापूर्ण टिजर

काठमाडौं – नेपाली बजारमा अर्को ईभी भ्यान भित्रिने भएको छ । नेपालमा पहिले देखि नै फोर्स र म्याक्ससका सवारी साधन बिक्री–वितरण गरिरहेको हिमालय अर्गनाइजेसन अन्तर्गतको हिमालय मोट्रक्स अर्थात म्याक्सस नेपालले आफ्नो सामाजिक सञ्जालमार्फत यो जानकारी दिएको छ ।

टिजर हेर्दा कुनै नयाँ इलेक्ट्रिक भ्यान नेपाल भित्रिने तयारीमा रहेको बुझिन्छ । ‘समथिङ बिग, लन्चिङ सुन इन नेपाल’, ‘अ न्यु सरप्राइज इज अन इट्स वे’, ‘ओ, सरी अगेन, हेयर कम्स एनादर वान’ भन्ने तरिकाले कम्पनीले नयाँ ईभी भ्यानको तस्बिर सार्वजनिक गरेको छ । ४३६ किलोमिटर (डब्लुएलटीपी), लक्जरी १६ सिटर तथा बोल्ड एन्ड स्टाइलिस लेखिएको सो टिजरबाटै धेरै कुरा अनुमान पनि गर्न सकिन्छ ।

यस अनुसार नेपालमा अब छिट्टै नै म्याक्ससको ईभी भ्यान समेत भित्रिन थालेको अनुमान गर्न सकिन्छ । सो भ्यानले सिंगल चार्जमा ४३६ किलोमिटरको रेन्ज दिने र यो १६ सिटर लक्जरी भ्यान रहेको अनुमान गर्न सकिन्छ । यसमा १०२.२ किलोवाट आवरको ब्याट्री प्याक हुनेछ भने २०३ एमएमको ग्राउन्ड क्लियरेन्स् हुनेछ । अन्य विशेषता वारेमा पछि थाहा हुनेछ ।

कम्पनीका अनुसार आगामी साउन महिनामा सम्पन्न हुने नाइमा मोबिलिटी एक्सपो २०२६ मा औपचारिक रुपमा सो ईभी भ्यान लन्च गरिने छ । उक्त भ्यान नेपालमा उपलब्ध पहिलो युरोपियन सर्टिफाइड प्रिमियम ईभी भ्यान हुने र यसको अन्य फिचर समेत त्यही समयमा सार्वजनिक हुनेछ ।

नेपाली बजारमा म्याक्सस ब्रान्डको ई–टेरानो पिकअप र मिफा एमपीभी पहिले देखि नै हिमालय मोट्रक्सले बिक्री–वितरण गरिरहेको छ । अब यसमा ईभी भ्यान समेत थपिने भएको छ ।

पाँच जना बस्न मिल्ने म्याक्सस ई(टेरानो पिकअप गत वर्ष मनाङमा लन्च गरिएको थियो । त्यसैगरी म्याक्सस मिफा एमपीभी समेत प्रिमियम ग्राहकका लागि उपयुक्त हुने गरी डिजाइन गरिएको छ ।