मारुती सुजुकी वागनआर फेसलिफ्ट आउने, देखियो परीक्षणमा

मारुती सुजुकीले यस वर्ष आफ्नो लोकप्रिय ह्याचब्याक वागनआरको फेसलिफ्ट भर्सन लन्च गर्ने सम्भावना रहेको छ । उक्त मोडल परीक्षणको समयमा देखिएको छ । हाल मारुती वागनआरको तेस्रो जेनेरेसन बिक्री भइरहेको छ, जसलाई जनवरी २०१९ मा लन्च गरिएको थियो । मारुती सुजुकी वागनआर हाल १४ भेरिएन्टमा २ इन्जिन र २ ट्रान्समिसन विकल्पमा उपलब्ध छ ।

लुक र डिजाइन
नयाँ वागनआर फेसलिफ्टमा कालो रङको रुफ बाहेक एक्सटेरियर लुकमा खासै परिवर्तन गरिएको छैन । यद्यपि, यसमा नयाँ ड्युअल–टोन एक्सटेरियर र नयाँ अलोय ह्विल समावेश गरिने छ ।

इन्टेरियर र फिचर
मारुतीले सो कारको इन्टेरियरमा धेरै परिवर्तनहरु समावेश गर्ने अपेक्षा गरिएको छ । वागनआर फेसलिफ्ट मोडेलमा नयाँ ९ इन्चको डिजिटल टचस्क्रिन इन्फोटेनमेन्ट सिस्टम हुने सम्भावना छ । यसको साथै लन्चिङ पछि यसमा अपहोल्स्ट्री सहित इन्टेरियर फिचरमा अन्य परिवर्तनहरू देख्न सकिन्छ ।

इन्जिन विकल्प र पावर
हाल उपलब्ध मारुतीको तेस्रो जेनेरेसन वागनआर १४ भेरिएन्टमा उपलब्ध छ । यो १.० लिटर के१०बी पेट्रोल इन्जिन वा १.२ लिटर के१२एम पेट्रोल इन्जिनमा बिक्री हुन्छ । १.० लिटर इन्जिनले ६७ बीएचपीको पावर र ९० एनएमको टर्क जेनेरेट गर्छ भने १.२ लिटर इन्जिनले ८२ बीएचपी पावर र ११३ एनएम टर्क जेनेरेट गर्छ ।

गियरबक्स
नयाँ वागनआर फेसलिफ्टको इन्जिन विकल्पहरू यथावत रहने सम्भावना छ । मारुती वागनआरको फेसलिफ्ट भर्सनमा ५ स्पिड म्यानुअल गियरबक्स वा ४ स्पिड अटोमेटिक ट्रान्समिसनको साथ उपलब्ध हुने अपेक्षा गरिएको छ । मारुतीले नयाँ वागनआरको इन्धनमा केही परिवर्तन गर्ने सम्भावना रहेको छ ।