भारतमा बनेको सुजुकी फ्रङ्क्स जापानमा निर्यात सुरु

मारुती सुजुकीले मेड इन इन्डिया फ्रङ्क्सलाई जापानमा निर्यात गर्न सुरु गरेको छ । गुजरातको पिपावाव बन्दरगाहबाट १ हजार ६०० भन्दा बढी फ्रङ्क्सको पहिलो खेप पठाइएको कम्पनीले जनाएको छ ।

फ्रङ्क्स जापानमा निर्यात हुने मारुती सुजुकीको दोस्रो मोडल हो । कम्पनीले सन् २०१६ मा बलेनोलाई पहिलोपटक जापान निर्यात गरेको थियो । एसयूभीको हकमा भने यो जापान निर्यात हुने पहिलो मोडल हो ।

सुजुकीको हर्टेक्ट प्लेटफर्ममा आधारित फ्रङ्क्स १.२ लिटर पेट्रोल र १.० लिटर टर्बो पेट्रोल ईन्जिनमा उपलब्ध छ । जसको पावर क्रमश ८९ तथा ९९ र टर्क ११३ तथा १४८ एनएम छ । यो कार ५–स्पीड म्यानुअल, ५–स्पीड एएमटी र ६–स्पीड अटोमेटिक ट्रान्समिसन विकल्पमा उपलब्ध छ ।

भारतको सबैभन्दा ठूलो प्यासेन्जर कार निर्माता मारुती सुजुकीले हाल विश्वका १०० भन्दा बढी देशमा कार निर्यात गर्दै आएको छ । कम्पनीले गत आर्थिक वर्षमा मात्रै २ लाख ८० हजार कार भारत बाहिर निर्यात गरेको थियो । यो आर्थिक वर्षको पहिलो त्रैमासिकमा मात्र सुजुकीले रेकर्ड ब्रेक निर्यात गर्दै ७० हजार ५६० कार भारत बाहिर निर्यात गरेको छ ।