नेपाल सहित विभिन्न देशका २०० जना रोयल इन्फिल्ड राइडर मनाङ यात्रामा जाँदै

काठमाडौं– नेपाल, भारत, भुटान र अष्ट्रेलिया लगायत विभिन्न देशका रोयल इन्फिल्ड राइडर मनाङ यात्रामा जाने भएका छन् ।

फागुन २५ देखी २८ गतेसम्म चल्ने उक्त राइडमा २०० हाराहारी राइडर सहभागी हुने आयोजक संस्था काठमान्डु लेजेन्ड्सले जनाएको छ । ‘मनाङ म्यानिया’ नामले आयोजना हुन लागेको सो कार्यक्रममार्फत उक्त क्षेत्रको पर्यटन प्रबद्र्धनमा थप टेवा पुग्ने विश्वास लिइएको छ ।

कार्यक्रममा नेपालका विभिन्न जिल्ला, भारतका विभिन्न राज्य, भुटान र अस्ट्रेलिया लगायत देशबाट रोयल इन्फिल्ड मोटरसाइकल राइडर सहभागी हुने काठमाडौं लेजेन्ड्सका अध्यक्ष रमेश अवालेले जानकारी गराए ।

उनका अनुसार राइडरहरुले स्थानीय रमणीय स्थलहरुको पदयात्रा, विभिन्न स्थानीय सांस्कृतिक कार्यक्रमहरु, स्थानीय खानाका परिकारहरु र विभिन्न खेलहरुको मज्जा लिनेछन् ।

रोयल इन्फिल्ड नेपाल प्रमुख प्रायोजक रहने सो कार्यक्रममा कवच गियर, गल्फ ल्युब, सेटाफिल र फिल्ली क्याफे लगायत कम्पनीहरुको सहयोग रहनेछ । कार्यक्रममा स्थानीय युवाहरु र स्थानीय निकाय लागयत विभिन्न संघ संस्थाहरुको समेत सहभागिता रहनेछ ।