महिन्द्राको नयाँ अफ-रोड एसयूभी थार रक्स लन्च, फोर्स गोर्खासँग प्रतिस्पर्धा गर्ने

महिन्द्रा एण्ड महिन्द्राले थार रक्स भारतीय बजारमा लन्च गरेको छ । यो कम्पनीको सबैभन्दा लोकप्रिय एसयूभी थारको ५ डोर संस्करण हो । सो एसयूभीमा हालको ३ डोर थारको अफ रोड टेक्नोलोजी दिइएको छ ।

थार रक्समा नयाँ ६ स्लेट ग्रिल, एलईडी लाइटिङ सेटअप, १०.२५ इन्चको टचस्क्रिन, भेन्टिलेटेड फ्रन्ट सिट र अटो एसी जस्ता फिचर समावेश गरिएको छ । सेफ्टिका लागि नयाँ एसयूभीमा ६ वटा एयरब्याग,  ३६० डिग्री क्यामेरा सेटअप, टायर प्रेसर मनिटरिङ सिस्टम र इलेक्ट्रोनिक स्टेबिलिटी कन्ट्रोल र एडास जस्ता फिचर प्रदान गरिएको छ ।

थार रक्सको डिजाइनले थ्री-डोर थारको जस्तै बक्सी प्रोफाइलको छ । यद्यपि यसमा केही परिवर्तन गरिएको छ । सो एसयूभीमा सी आकारको एलईडी डीआरएलसहितको एलईडी हेडलाइट र नयाँ बडी कलर ६ स्लेट ग्रिल दिइएको छ । यसको फग लाइट र टर्न इन्डिकेटर ३ डोर थारको ठाउँमा भए पनि डिजाइन परिवर्तन गरिएको छ ।

साइड प्रोफाइलमा २ वटा अतिरिक्त ढोका जडान गरिएकव छ । पछाडिको ढोकाको ह्यान्डल सी-पिलरमा फिट गरिएको छ । यसमा १९ इन्चको ड्युअल टोन अलोय ह्विल, म्याट रूफ र प्यानोरामिक सनरुफ पनि दिइएको छ । कम्पनीले यसको तल्लो भेरिएन्टमा सिंगल पेन सनरुफ पनि उपलब्ध गराएको छ ।

यसको टेललाइटलाई सी-सेप दिइएको छ र पछाडि टेलगेट माउन्टेड स्पेयर ह्विल पनि दिइएको छ । यसको पछाडिको ग्लासमा वाइपर पनि लगाइएको छ, जुन ३ डोर थारमा पाइँदैन । पछाडिको झ्याल र पछाडिको ढोका पहिले जस्तै छुट्टाछुट्टै खोल्न मिल्छ ।

५ डोर थारमा १०.२५ इन्चको डिजिटल ड्राइभर डिस्प्ले र १०.२५ इन्चको इन्फोटेनमेन्ट सिस्टम छ । साथै प्यानोरामिक सनरुफ, रियर एसी भेन्टसहित अटोमेटिक क्लाइमेट कन्ट्रोल, भेन्टिलेटेड फ्रन्ट सिट, वायरलेस फोन चार्जिङ र पुश बटन स्टार्ट/स्टपसहित कीलेस इन्ट्री जस्ता फिचर पनि उपलब्ध छ । सो एसयूभीको दोस्रो पङ्क्तिमा चाइल्ड आईएसओफिक्स एंकर सिट, फोल्ड गर्न मिल्ने सेन्टर आर्मरेस्ट, थ्री-पोइन्ट सिट बेल्ट र सबै यात्रुका लागि एड्जस्टेबल हेडरेस्ट उपलब्ध छ ।

सो एसयूभीको बेस पेट्रोल एमएक्सवन भेरिएन्टको मूल्य १२ लाख ९९ हजार बेस डिजेल मोडलको मूल्य १३ लाख ९९ हजार भारु राखिएको छ । नयाँ थार रक्सको मूल्य स्ट्यान्डर्ड भन्दा १ लाख ६४ हजार भारु महँगो छ । 

अन्य भेरिएन्टको मूल्य पनि छिट्टै सार्वजनिक गरिने छ । सो एसयूभीको बुकिङ सुरु भएको छ । यसको डेलिभरी अर्को महिना सुरु हुने अपेक्षा गरिएको छ। महिन्द्रा थार रक्सले ५ डोर फोर्स गोर्खासँग प्रतिस्पर्धा गर्नेछ ।