महिन्द्रा एक्सयूभी ७एक्सओ जनवरी ५, २०२६ मा लन्च हुँदै, पहिलो आधिकारिक टिजर सार्वजनिक

महिन्द्राले आफ्नो नयाँ एसयूभी महिन्द्रा एक्सयूभी ७एक्सओ जनवरीमा लन्च गर्ने घोषणा गरेको छ। कम्पनीले सो एसयूभीको १४ सेकेन्डको टिजर पनि सार्वजनिक गरेको छ ।

महिन्द्रा एक्सयूभी ७एक्सओ, कम्पनीको लोकप्रिय मोडल एक्सयूभी ७०० को अपडेटेड संस्करणका रूपमा आउनेछ। सार्वजनिक गरिएको टिजरका अनुसार यसमा आकर्षक एल आकारका एलईडी डीआरएल, प्रोजेक्टर हेडलाइट तथा एलईडी टेललाइटको झलक देख्न सकिन्छ । सो ७एक्सओले महिन्द्राको एसयूभी लाइनअपलाई आधुनिक स्वरूप दिने अपेक्षा गरिएको छ।

सो एसयूभीमा प्रिमियम इन्टेरियर, प्यानोरामिक सनरुफ, एडास, हर्मन अडियो सिस्टम, ट्रिपल–स्क्रिन सेटअप, ३६०-डिग्री क्यामेरा, ईबीडी सहित एबीएस, ६ एयरब्याग, तथा आईसोफिक्स चाइल्ड एंकरेज जस्ता फिचर समावेश हुने अनुमान छ ।

इन्जिनको विकल्पमा यसमा पेट्रोल र डिजेल दुवै विकल्पमा उपलब्ध हुने अनुमान छ । यो २.० लिटर टर्बोचार्ज्ड पेट्रोल तथा २.२ लिटर टर्बोचार्ज्ड डिजेल इन्जिनका साथ आउने सम्भावना छ। ट्रान्समिसनका लागि ६ स्पिड म्यानुअल र ६ स्पिड अटोमेटिक विकल्प उपलब्ध गराइनेछ।

सो एसयूभीले एमजी हेक्टर, टाटा सिएरा, टाटा सफारी, हुन्डाई क्रेटा, होन्डा एलिभेट, किया सेल्टोस तथा हुन्डाई क्रेटा जस्ता लोकप्रिय मोडलसँग प्रतिस्पर्धा गर्नेछ ।