धेरै प्रतीक्षा पश्चात महिन्द्रा एक्सयूभी ७०० नेपालमा आजै लन्च हुँदै, यस्तो हुनेछ मूल्य

काठमाडौं – भारतीय बजारमा धेरै माग भएका कारण नेपाली बजारमा उपलब्ध हुन नसकेको महिन्द्राको एसयूभी एक्सयूभी ७०० नेपाली बजारमा समेत उपलब्ध हुने भएको छ । महिन्द्राको नेपालका लागि आधिकारिक वितरक अग्नि इन्कर्पोरेटेड प्रालिले सो एसयूभी आज लन्च गर्दैछ । यो भन्दा पहिले नै यसको मूल्य सार्वजनिक गरिएको छ ।

५ र ७ सिटर अप्सनमा उपलब्ध हुने एक्सयूभी ७०० तीन तीन भेरिएन्टमा उपलब्ध हुनेछ । ५ सिटर एक्सयूभी ७०० को मूल्य ७४ लाख, ८१ लाख र ८९ लाख हुनेछ भने ७ सिटर एक्सयूभी ७०० को मूल्य ८३ लाख, १ करोड ५ लाख र १ करोड १० लाख रुपैयाँ हुनेछ ।

कम्पनीको वेबसाइटमा समेत यसको मूल्य र फिचर सार्वजनिक गरिनुका साथै बुकिङ समेत गर्न सकिन्छ ।

५ र ७ सिट क्षमतामा आएको महिन्द्रा एक्सयूभी ७०० मा २.० लिटरको टर्बो पेट्रोल इन्जिन उपलब्ध हुनेछ । सो इन्जिनले २०० पीएस पावर र ३८० एनएम टर्क जेनेरेट गर्छ ।

महिन्द्रा ‘एक्सयूभी-७००’ मा प्रोजेक्टर एलईडी हेडल्याम्प, एलईडी डीआरएल, एलईडी टेल लाइट, ८ इन्चको टचस्क्रिन इन्फोटेनमेन्ट सिस्टम, ब्लुटुथ कनेक्टिभिटी, नेभिगेशन प्रणाली, रिमोर्ट स्टार्ट/स्टप, क्लाइमेट कन्ट्रोल, रिमोर्ट विन्डो कन्ट्रोल, मोवाइल एप र स्मार्टवाचवाट भेहिकल कन्ट्रोल जस्ता फिचर पाउन सकिन्छ । यसको टप भेरिएन्टमा भने १०.२५ इन्चको इन्फोटेन्टमेन्ट सिस्टम रहेको छ । यसैगरी यसमा थुप्रै यूनिक सुरक्षा फिचरहरु दिइएको छ । यसमा एडभान्स ड्राइभर असिस्टेन्ट सिस्टम, इबीडी सहितको एबीएस, सिट बेल्ट वार्निङ, अटोनोमस पार्किङ असिस्ट र स्पीड अलर्ट जस्ता अन्य फिचर पाउन सकिन्छ । यसमा रहेको बोस्चले चालकलाई निन्द्रा लागेको पत्ता लगाउने प्रविधि पनि प्रयोग गरिएको छ ।यसमा ६ वटासम्म स्पीकर र पानारोमिक सनरुफ पनि पाउन सकिन्छ ।

यसले नेपाली बजारमा टाटा सफारी र एमजी हेक्टर प्लससँग प्रतिस्पर्धा गर्नेछ । हाल उपलब्ध एक्सयूभी ५०० को तुलनामा एक्सयूभी ७०० नेपाली बजारमा महिन्द्राको ठूलो एसयूभी हुनेछ । यसले सन् २०२२ को ग्लोवल एनक्यापले प्रदान गर्ने ‘सेफर च्वाइस अवार्ड’ जित्न सफल भएको थियो । सो एसयूभीले ५ स्टार सेफ्टी रेटिङ पाएको छ ।