महिन्द्रा एक्सयूभी४०० अब प्रो रेन्जमा, यस्ता छन् नयाँ फिचर

महिन्द्रा एन्ड महिन्द्राले इलेक्ट्रिक अल न्यू एक्सयूभी४०० प्रो रेन्ज भारतमा लन्च गरेको छ । २०२४ महिन्द्रा एक्सयूभी४०० प्रो रेन्जलाई ईसी प्रो र ईएल प्रोको फरक फरक ब्याट्री प्याक र चार्जरको विकल्पमा लन्च गरिएको हो । सो एसयूभीले इलेक्ट्रिक टाटा नेक्सन र एमजी जेडएससँग प्रतिस्पर्धा गर्नेछ ।

नयाँ महिन्द्रा एक्सयूभी४०० प्रो रेन्जको लागि बुकिङ जनवरी १२ बाट सुरु हुनेछ र फेब्रुअरी १ बाट डेलिभरी सुरु हुनेछ । सो इलेक्ट्रिक एसयूभी २१ हजार भारुमा बुक गर्न सकिन्छ ।

महिन्द्रा एक्सयूभी४०० ईसी प्रोमा ३४.५ किलोवाट आवर ब्याट्री प्याक जडान गरिएको छ, जसले १५.९ पीएसको पावर र ३१० एनएमको टर्क जेनेरेट गर्छ । सिंगल चार्जमा सो ब्याट्रीले ३७५ किलोमिटरको रेन्ज प्रदान गर्छ । यसमा ३.३ किलोवाट र ७.२ किलोवाट चार्जरको विकल्प दिइएको छ ।

एक्सयूभी४०० ईएलमा ३९.४ किलोवाट आर लिथियम आयन ब्याट्री प्याक जडान गरिएको छ, जसले १५.९ पीएसको पावर र ३१० एनएमको टर्क जेनेरेट गर्छ । सिंगल चार्जमा सो ब्याट्रीले ४५६ किलोमिटरको रेन्ज प्रदान गर्छ ।

सो एसयूभी ० देखि १०० किलोमिटर प्रति घन्टाको स्पिड हासिल गर्न मात्र ८.३ सेकेन्डको समय लाग्छ । यसको टप स्पिड १५० किलोमिटर प्रतिघन्टा छ । सो एसयूभीमा फन, फास्ट र फियरलेस जस्ता ड्राइभिङ मोड दिइएको छ ।

अल न्यू एक्सयूभी४०० प्रो रेन्जमा नयाँ ड्युअल टोन इन्टेरियर समावेश गरिएको छ । साथै, यसमा नयाँ १०.२५ इन्चको टचस्क्रिन इन्फोटेनमेन्ट सिस्टमसहित नयाँ १०.२५ इन्च डिजिटल इन्स्ट्रयुमेन्ट क्लस्टरले सुसज्जित छ । नयाँ एसयूभीमा एड्रयुनोक्स कनेक्टेड कार सिस्टम, ५० भन्दा बढी फिचर, ड्युअल जोन अटोमेटिक टेम्परेचर कन्ट्रोल, वायरलेस चार्जर, रियर यूएसबी पोर्ट, रियर एसी भेन्ट्स जस्ता फिचरहरु छन् ।