महिन्द्रा एक्सयूभी ४०० ईभीको मूल्य ५२ लाख ५० हजार, बजेट पश्चात औपचारिक जानकारी गराइने

काठमाडौं – महिन्द्राका इलेक्ट्रिक गाडीको नेपालका लागि आधिकारिक वितरक अग्नि ग्रुप अन्तर्गतको अग्नि इनर्जीले महिन्द्राको नयाँ इलेक्ट्रिक कार एक्सयूभी ४०० को मूल्य ५२ लाख ५० हजार रुपैयाँ तोक्ने भएको छ । कम्पनी स्रोतका अनुसार बजेट पश्चात सो गाडी औपचारिक रुपमा नेपाली बजारमा सार्वजनिक गरिने छ ।

महिन्द्रा एक्सयूभी ४०० केही समय देखि नेपाली सडकमा परीक्षण भइरहेको छ । भारतमा पहिले नै सार्वजनिक भइसकेको भए पनि नेपाली बजारमा भने सो गाडी सार्वजनिक हुन सकेको थिएन । लामो समय देखि प्रतीक्षारत नेपाली ग्राहकले अब भने सो गाडी पाउने भएका छन् ।

नेपालमा महिन्द्रा एक्सयूभी ४०० को ईएल (ओ) भेरिएन्ट उपलब्ध हुनेछ । यसमा ११० किलोवाटको मोटर र ३९.४ किलोवाट आवरको ब्याट्री प्रयोग भएको छ । हाल परीक्षणको क्रममा रहेको र नेपाली बजारमा फरक खालको भेरिएन्ट उपलब्ध हुने भएकाले यसले दिने रेन्ज र अन्य फिचर भने पछि नै सार्वजनिक गर्ने कम्पनीले बताएको छ ।

महिन्द्राका इलेक्ट्रिक गाडीहरु कुनै समय नेपाली बजारमा निकै नै लोकप्रिय थिए । रेभा र ईटुओ जस्ता मोडलमार्फत नेपाली ग्राहकलाई इलेक्ट्रिक गाडीको रहर पुरा गराएको महिन्द्रासँग अहिले भने बिक्रीका लागि कुनै आकर्षक मोडल छैन ।

नेपाली बजारमा अन्य कम्पनीहरुले लगातार रुपमा नयाँ मोडल भित्र्यारहदा महिन्द्राले भने कुनै पनि मोडल उपलब्ध गराउन सकेको छैन । रेभा र ईटुओ जस्ता मोडल पनि छैनन् । यो अवस्थामा आगामी दिनमा महिन्द्रा एक्सयूभी ४०० ले नयाँ रौनक ल्याउने अपेक्षा गरिएको छ ।