शोरुम पुगे महिन्द्रा एक्सयूभी ४०० ईभी, नयाँ ईभीका साथ नेपाली बजारमा पुनरागमन गर्दै महिन्द्रा नेपाल

काठमाडौं – महिन्द्राको नयाँ इलेक्ट्रिक कार एक्सयूभी ४०० ईभी काठमाडौं लगायतका विभिन्न शोरुममा देखिन थालेका छन् । महिन्द्राको नेपालका लागि आधिकारिक वितरक अग्नि इनर्जीले महिन्द्राका शोरुमहरुमा नयाँ इलेक्ट्रिक गाडी समेत डिस्प्ले गरेको छ ।

कम्पनी स्रोतका अनुसार केही दिनमै सो गाडी औपचारिक रुपमा नेपाली बजारमा सार्वजनिक गरिने छ । केही दिन पहिले नै यसको मूल्य ५२ लाख ५० हजार रुपैयाँ सार्वजनिक भइसकेको छ ।

नेपाली बजारमा महिन्द्रा एक्सयूभी ४०० ईभीको ईएल (ओ) भेरिएन्ट उपलब्ध भएको हो । यसमा ११० किलोवाटको मोटर र ३९.४ किलोवाट आवरको ब्याट्री प्रयोग भएको छ । यद्यपि यसको रेन्ज र अन्य फिचर भने कम्पनीले आधिकारिक रुपमा सार्वजनिक गरेको छैन ।

महिन्द्राका इलेक्ट्रिक गाडीहरु कुनै समय नेपाली बजारमा निकै नै लोकप्रिय थिए । रेभा र ईटुओ जस्ता मोडलमार्फत नेपाली ग्राहकलाई इलेक्ट्रिक गाडीको रहर पुरा गराएको महिन्द्रासँग केही समय यता बिक्रीका लागि इलेक्ट्रिक गाडी थिएन ।

अब महिन्द्रा एक्सयूभी ४०० ईभीले केही नयाँपन ल्याउने अपेक्षा गर्न सकिन्छ ।