महिन्द्रा एक्सयूभी ३०० अब हुनेछ महिन्द्रा एक्सयूभी थ्रीएक्सओ, थपिदै थुप्रै फिचर

महिन्द्रा एण्ड महिन्द्राले यो वर्ष आफ्नो पोर्टफोलियो विस्तार गर्ने तयारी गरिरहेको छ । यसको सुरुवात अप्रिल २९ देखि सुरु हुनेछ । कम्पनीले सोही दिन एक्सयूभी३०० को फेसलिफ्ट मोडल लन्च गर्नेछ । यो कार हालै परीक्षणको क्रममा धेरै पटक देखा परेको छ ।

कम्पनीले आफ्नो आगामी कारको टिजर पनि सार्वजनिक गरेको छ । टिजर अनुसार महिन्द्रा एक्सयूभी३०० फेसलिफ्टलाई एक्सयूभी थ्रीएक्सओ (XUV 3XO) नाममा लन्च गरिनेछ । कारको मूल्य ९ लाख भारुबाट हुनेछ । यो सेगमेन्टमा सो कारले मारुती ब्रेजा, हुन्डाई भेन्यू, किया सोनेट, टाटा नेक्सन, रेनो काइगर, निसान म्याग्नाइट, मारुती सुजुकी स्विफ्ट र टोयोटा अर्बन क्रुुजर टेसरसँग प्रतिस्पर्धा गर्नेछ ।

नयाँ मोडेलमा हालको संस्करणको तुलनामा धेरै कस्मेटिक र फिचर अपग्रेड गरिने छ । टिजरमा कम्प्याक्ट एसयूभीको नयाँ कनेक्टेड टेललाइट र बम्पर देखिएको छ । यसमा महिन्द्राको ट्विन पिक लोगोका साथै नयाँ एक्सयूभी थ्रीएक्सओको ब्याजिङ पनि दिइएको छ ।

कारको फ्रन्ट लुक एकदमै नयाँ रहेको छ । कारको फ्रन्ट ग्रिलमा क्रोम फिनिस्ड त्रिकोणीय एलिमेन्ट दिइएको छ । साथै यसमा फग शेप्ड एलईडी डीआरएल, प्रोजेक्टर हेडलाइट, फग ल्याम्प, इलेक्ट्रिक सनरुफ र नयाँ डिजाइनको लेयर्ड स्पोक अलोय ह्विल उपलब्ध हुनेछ ।

यद्यपि कम्पनीले यसको इन्टेरियर लुकको बारेमा खुलासा गरेको छैन । टिजर अनुसार यसमा नयाँ सिट अपहोल्स्ट्री, नयाँ टचस्क्रिन, १०.२५ इन्चको ड्युअल डिजिटल डिस्प्ले, वायरलेस फोन चार्जिङ र भेन्टिलेटेड फ्रन्ट सिट रहेको छ । सेफ्टीका लागि कारमा ६ एयरब्याग, इलेक्ट्रोनिक पार्किङ ब्रेक, ३६० डिग्री क्यामेरालगायतका फिचर समावेश गर्नेछ ।

सो कार महिन्द्राले पेट्रोल र डिजेल इन्जिनमा लन्च गर्नेछ । यसमा १.५ लिटर डिजेल इन्जिन, १.२ लिटर टर्बो पेट्रोल इन्जिन र १.२ लिटर डाइरेक्ट इन्जेक्शन टर्बो पेट्रोल इन्जिन समावेश छ । यद्यपि कारमा १.२ लिटर टर्बो पेट्रोल टीजीडीआई इन्जिन पनि उपलब्ध हुनेछ, जुन ६ स्पिड अटोमेटिक गियरबक्सको साथ उपलब्ध हुनेछ ।