नयाँ नामले आउने भयो महिन्द्रा थार ५ डोर, एडास र ३६० डिग्री क्यामेरा पाइने

काठमाडौं– महिन्द्राको बहुप्रतिक्षित एसयुभी थार ५ डोर नयाँ नामले आउने भएको छ । थारको ५ डोर भर्सनलाई कम्पनीले रक्स नाम थपेर ल्याउने भएको हो । सो एसयूभी १५ अगष्टमा लन्च हुने तय भएको छ ।

थार रक्समा एडास र ३६० डिग्री क्यामेरा लगायत फिचर उपलब्ध हुने महिन्द्राले जनाएको छ । सो एसयूभीको लुक्स र डिजाइन हाल उपलब्ध ३ डोर भर्सनको जस्तै हुने भएपनि एक्सटेरियरमा केही परिवर्तन हुनेछ । पुरानै सर्कुलर हेडल्याम्प उपलब्ध हुने थार रक्समा सी आकारको डिआरएलसंगै एलईडी प्रोजेक्टर सेटअप भने थप हुनेछ ।

नयाँ थार म्यानुअल र अटोमेटिक गियरवक्स विकल्पमा उपलब्ध हुनेछ भने पेट्रोल र डिजेल दुबै इन्जिनमा आउनेछ । सो लाइफस्टायल एसयुभीमा १.५लिटर डिजेल, २.२ लिटर डिजेल र २.२ लिटर पेट्रोल इन्जिनको विकल्प पाइनेछ ।

फिचरको कुरा गर्नुपर्दा यसमा १०.२५ इन्चको डुअल डिस्प्ले, पानारोमिक सनरुफ, सम्पूर्ण लाइट एलइडी र डायमन्ट कट एलोई ह्विल लगायत उपलब्ध हुनेछ । थार रक्स पुरानो ३ डोर भर्सनजस्तै रियर–ह्विल–ड्राइभ र फोर–ह्विल–ड्राइभ भेरिएन्टमा आउने निश्चित भएको छ ।