असफल भयो महिन्द्रा र साङयोङ बिचको साझेदारी, बिक्री भयो साङयोङको सबै स्वमित्व

महिन्द्रा एन्ड महिन्द्रा र कोरियन अटो मेकर साङयोङ बिचको साझेदारी अन्तत असफल भएको छ । सन् २०१० मा महिन्द्राले साङयोङको ७५ प्रतिशत सेयर खरिद गरेर प्रिमियम एसयुभी सेग्मेन्टमा बजार हिस्सा बढाउने अपेक्षा लिएको थियो । तर ११ बर्ष बित्दासमेत उक्त अपेक्षा पुरा हुन नसकेको र उल्टै कम्पनी घाटामा गएको भन्दै महिन्द्राले आफ्नोसहित साङयोङको पूर्ण स्वमित्व अर्को कोरियाली कम्पनी इडिसन मोटर्सलाई २५ कारोड ४६ लाख ५० हजार डलरमा बिक्री गरेको छ ।

साङयोङसंगको साझेदारीमा महिन्द्राले एक्सयुभी ३०० र अलटुरस जी४ एसयुभी उत्पादन गरेको थियो । यी दुई एसयुभीलाई उसले साङयोङको टिभोली र रेक्स्टनको प्लेटफर्ममा उत्पादन गरेर बिक्री थालेपनि बजारमा खासै सफल हुन सकेन । साथै साङयोङ ब्रान्डमै रेक्सटन, कोरान्डो, टिभोली र आर/स्पोर्टस जस्ता एसयुभी उत्पादन गरी बिश्व बजारमा बिक्री बितरण गर्दै आएको थियो ।

महिन्द्रासंगको साझेदारीले यी मोडलको बिक्रीमा सुधार ल्याउने अपेक्षा गरिएपनि त्यसको ठिक बिपरित बिक्री घट्दै गएको थियो । जसका कारण सन् २०२० मै कम्पनीले १०० अर्ब वोन दायित्व रहेको भन्दै कम्पनी टाटा पल्टेको घोषणा गरिएको थियो । कम्पनीले २०२१ मा मात्र सञ्चालन घाटा २ सय ३८ अर्ब वोन बेहोर्नुपरेको थियो ।

साङयोङमा गरेको ठूलो लगानी असफल भएपछि महिन्द्रालाई आफ्नै ब्रान्डमा थप लगानी जुटाउन समेत समस्या परेको थियो । जसका कारण उसले भारतीय बजारमा समेत आफ्नो बजार हिस्सा केहीमात्रामा गुमाउनु परेको थियो । निरन्तरको घाटा र यसले महिन्द्रा ब्रान्डको बिस्तारमै असर पार्ने देखेपछि उसले साङयोङबाट अलग हुने निर्णय लिएको हो ।