महिन्द्राले ७ महिनामा बेच्यो ३० हजार विद्युतीय कार, नेपालमा प्रभाव कम

काठमाडौं– महिन्द्राले आफ्नो विद्युतीय कारको बिक्रीमा एक प्रमुख माइलस्टोन हाँसिल गरेको छ । कार निर्माताले आफ्नो बोर्न इलेक्ट्रिक सेग्मेन्टको नेतृत्वमा ७ महिना भित्र ३० हजार भन्दा बढी विद्युतीय एसयुभी बिक्री गरेको छ ।

यो घोषणा महिन्द्राले एक्सईभी ९ एस ७ सटर विद्युतीय एसयुभीलाई लन्च गर्ने घोषणाका साथ आफ्नो बोर्न इलेक्ट्रिक लाइनअप विस्तार गर्न तयारी गरिरहेको बेला आएको हो ।

सामाजिक सञ्जालमा एक पोस्ट गर्दै महिन्द्राले भनेको छ ‘यो भारतलाई असिमित विश्वास गर्नेहरु बाट सुरु भएको थियो र त्यो विश्वास केवल ७ महिनामा भारतीय सडकहरूमा ३० हजार भन्दा बढी महिन्द्रा ईभी बिक्री भएबाट प्रमाणित भएको छ ।’

कम्पनीले नयाँ बिद्युतिय एसयुभी एक्सईभी ९ एसलाई नोभेम्बर २७ मा लन्च गर्ने तयारी गरेको छ । सो नयाँ कार हालको एक्सईभी ९ई भन्दा माथि रहने अपेक्षा गरिएको छ । कार डुअल–मोटर अल ह्विल ड्राइभ कन्फिगरेसनमा उपलब्ध हुने अनमान गरिएको छ ।

नेपालमा किन गुमनाम ?
भारतिय बजारमा राम्रै बिक्री पाइरहेको महिन्द्रा ईभीले नेपाली बजारमा भने कुनै प्रभाव पार्न सकिरहेको छैन । गत साउनमा सम्पन्न नाइमा मोबिलिटी एक्स्पोमार्फत लन्च गरिएका महिन्द्रा एक्सईभी ९ ई र बीई ६ अहिले गुमनामको अवस्थामा छ । कम्पनीले यसअघि ल्याएको एक्सयुभी ४०० ईभी ले समेत नेपाली ईभी पारखीको बिश्वास जित्न सकेन ।

चिनियाँ ब्रान्डको बढ्दो क्रेजका कारण भारतिय ब्रान्डका बिद्युतीय कारलाई बजार लिन कठिन परेसंगै महिन्द्राको नेपाली बजार प्रभावित बनेको सहजै अनुमान गर्न सकिन्छ ।