महिन्द्राद्वारा नयाँ इलेक्ट्रिक एसयूभीको टिजर सार्वजनिक, नोभेम्बर २६ मा दुई मोडल लन्च हुँदै

महिन्द्राले आफ्नो नयाँ इलेक्ट्रिक एसयूभीको पहिलो झलक सार्वजनिक गरेको छ । कम्पनीले सामाजिक सञ्जालमा २३ सेकेन्डको टिजर भिडियो जारी गर्दै चाँडै भारतीय बजारमा नयाँ इलेक्ट्रिक एसयूभी लन्च हुने जानकारी दिएको छ । भिडियोमा एसयूभीको डिजाइन, विशेषता र लन्च मितिसमेत खुलाइएको छ।

महिन्द्राले नयाँ इलेक्ट्रिक एसयूभी महिन्द्रा बीई -याल-ई लन्च गर्न लागेको हो । सो एसयूभीमा कम्पनीका अन्य इलेक्ट्रिक मोडलसँग मेल खाने आधुनिक डिजाइन, उन्नत सुविधा र नयाँ प्रविधि समावेश गरिने अपेक्षा गरिएको छ ।

साथै महिन्द्राले स्क्रिम इलेक्ट्रिक नामक विशेष कार्यक्रम नोभेम्बर २६ मा आयोजना गर्दै दुईवटा इलेक्ट्रिक एसयूभी सार्वजनिक गर्नेछ । सो कार्यक्रममा महिन्द्रा बीई -याल-ईसँगै महिन्द्रा एक्सईभी ९एस पनि प्रस्तुत गरिनेछ ।  यो कम्पनीको पहिलो इलेक्ट्रिक सात सिटर एसयूभी हुनेछ ।

महिन्द्राले हाल इलेक्ट्रिक सेग्मेन्टमा बीई६ र एक्सईभी ९ई मोडल उपलब्ध गराइरहेको छ । यी दुबै मोडलमा एड्भान्स फिचर समावेश गरिएकाे छ । अब नयाँ लन्चसँगै महिन्द्रा इलेक्ट्रिक एसयूभीको पोर्टफोलियो अझै विस्तार हुने र प्रतिस्पर्धा पनि बढ्ने देखिन्छ।