टाटालाई पछि पार्दै महिन्द्रा बन्यो भारतको दोस्रो ठूलो कार निर्माता

सन् २०२५ महिन्द्रा एण्ड महिन्द्राका लागि ऐतिहासिक वर्ष बनेको छ। कम्पनीले पहिलो पटक एकै वर्षमा ६ लाखभन्दा बढी सवारी साधन बिक्री गर्दै नयाँ कीर्तिमान स्थापना गरेको छ। महिन्द्राले डिसेम्बर महिनामा मात्रै ५० हजार ९४६ एसयूभी बिक्री गर्न सफल भयो।

महिन्द्राको पोर्टफोलियोमा हाल  विभिन्न सेगमेन्टका एसयूभीदेखि नयाँ पुस्ताका इलेक्ट्रिक सवारी साधन समावेश छ । कम्पनीले पेट्रोल, डिजेल र इलेक्ट्रिक विकल्पहरूलाई सन्तुलित रूपमा अघि बढाउदै आएको छ । सन् २०२५ मा महिन्द्राले टाटा मोटर्सलाई उछिन्दै दोस्रो स्थान हासिल गरेको छ भने टाटा तेस्रो स्थानमा झरेको छ। हुन्डाई चौथो स्थानमा रहेको छ।

बिक्रीको दृष्टिले हेर्दा, सन् २०२५ मा महिन्द्राले कुल ६ लाख २५ हजार ६०३ एसयूभी बिक्री गरेको छ। यो अघिल्लो वर्षको तुलनामा करिब ९७ हजार सवारी बढी हो । महिन्द्राको यो सफलतामा स्कोर्पियो एन र स्कोर्पियो क्लासिकको ठुलो योगदान रहेको छ । त्यसैगरी, थारले पनि बजारमा आफ्नो प्रभाव झनै मजबुत बनाएको छ। थारको बिक्रीमा ५५ प्रतिशतको उल्लेखनीय वृद्धि देखिएको छ।

कम्पनीका नयाँ इलेक्ट्रिक एसयूभीहरू बीई ६ र एक्सईभी ९ई ले पनि सकारात्मक प्रतिक्रिया पाएको छ । यी दुई मोडलले वर्षको पहिलो ११ महिनामा करिब ३८ हजार ८४१ युनिट बिक्री गर्दै कम्पनीको कुल बिक्रीमा करिब ७ प्रतिशत हिस्सा ओगटेको छ ।