महिन्द्राको नयाँ ईभीले ल्याएको तरंग र अबको ईभी प्रतिस्पर्धा, नेपालमा सम्भावना

भारतीय अटो निर्माता कम्पनी महिन्द्राले हालै दुई नयाँ ईभी लन्च गरेको छ । ईभी उत्पादनमा लामो अनुभव भएर पनि नयाँ प्रविधिलाई आत्मसात गर्न नसकेका कारण महिन्द्रा ईभी रेसमा पछि पर्दै आएको थियो । कम्पनीले दुई दशक अघिनै अष्ट्रियन कम्पनी रेभासँग सहकार्य गरेर ईभीको उत्पादन थालेको थियो । पछि यसलाई महिन्द्रा ईटुओ नाम दिएर बजारमा बिक्री गरियो । जुन हाल पनि नेपाली सडकमा गुडिरहेको देख्न सकिन्छ ।

विगत केही वर्षयता चिनियाँ अटो उत्पादक कम्पनीहरुले विद्युतीय कारको बजारलाई रकेटको गतिमा अघि बढाएपछि विश्वभरका अटो उत्पादक ईभी रेसमा होमिन थालिसकेका छन् । सोही मेसोमा महिन्द्राले पनि आफ्नो नयाँ ईभी एक्सईभी ९ई र बीई ६ई लन्च गरेको छ । यी ईभी मुख्यतः भारतीय बजारलाई केन्द्रित गरी उत्पादन गरिए पनि यसले विश्व अटो बजारमै तरंग पैदा गरिदिएको छ । हालसम्म कुनै पनि ईभी ब्रान्डले दिन नसकेको ब्याट्रीमा लाइफ टाइम वारेन्टी दिएर महिन्द्राले ईभी बजारमा नयाँ युद्ध छेडेको छ ।

कम्पनीले यी दुई ईभीमा उपलब्ध गराएको ५९ किलोवाट र ७९ किलोवाटसम्मको ब्याट्री प्याकमा लाइफ टाइम वारेन्टी सुविधा दिएको हो । एलएफपी केमिस्ट्री भएका यी ब्याट्रीले अल्ट्रा फास्ट चार्जिङ समेत सपोर्ट गर्ने र १७५ किलोवाट चार्जरको मद्दतले २० मिनेटमा २० देखि ८० प्रतिशतसम्म चार्ज गर्न सकिने दाबी गरिएको छ । यी वाहेक गाडीमा भएका विभिन्न विशेषता र लु्क्सका कारण गाडीको चर्चा चुलिएको छ ।

यस्तो छ मुल्य र विशेषता
महिन्द्राले बीई ६ई को शुरुवाती मूल्य १८ लाख ९० हजार र एक्सईभी ९ई को मूल्य २१ लाख ९० हजार भारु पर्ने जनाएको छ । यी दुवै इलेक्ट्रिक एसयूभीको डेलिभरी सन् २०२५ को फेब्रुअरीबाट सुरु हुनेछ ।

कम्पनीले यी दुबै एसयूभीमा आकर्षक लुक र डिजाइनका साथै भरिपूर्ण फिचरले सुसज्जित गरेको छ । एक्सईभी ९ई मा ४३ इन्चको ट्रिपल स्क्रिन सेटअप दिइएको छ, जसमा यात्रु, चालक र सेन्ट्रल इन्फोटेनमेन्ट प्रदान गरिएको छ । यसलाई एकसाथ सिङ्क गरी थिएटर मोडमा रूपान्तरण गर्न सकिन्छ । बीई ६ई मा १२.३ इन्चको ड्युअल स्क्रिन सेटअप दिइएको छ ।

सो एसयूभीमा ३६० डिग्री क्यामेरा, अटो एडजस्टिङ हेडअप डिस्प्ले भिजन, वायरलेस एन्ड्रोइड अटो र एप्पल कारप्ले, मल्टिपल ड्राइभ मोड, कनेक्टेड कार फिचर, ६ एयरब्याग, १६ कलर विकल्पसहितको एम्बियन्ट लाइटिङ र एड्भान्स ड्राइभर असिस्टेन्ट समावेश छ ।

सो एसयूभी इङलो इलेक्ट्रिक ओरिजिन आर्किटेक्चरमा निर्माण गरिएको छ । एक्सईभी ९ई को लम्बाइ ४७८९ एमएम र ग्राउन्ड क्लियरेन्स २०७ एमएम छ । यसमा १९५ लिटरको फ्रन्ट स्पेस र ६६३ लिटरको बुट स्पेस रहेको छ । साथै बीई ६ई को लम्बाइ ४३७१ एमएम र ४५५ लिटर बुट स्पेस छ तथा फ्रन्टमा ४५ लिटर स्पेस रहेको छ ।

महिन्द्रा एक्सईभी ९ई मा स्लिक एरोडायनामिक कुपे एसयूभी डिजाइन दिइएको छ । यसमा बोल्ड त्रिकोणीय हेडल्याम्प सेटअप, फ्लेर्ड ह्विल आर्च, फराकिलो एलईडी लाइटबार र १९ इन्चको ह्विल छ । साथै बीई ६ईमा इन्टिग्रेटेड इन्भर्टेड एल आकारको डीआरएल, २० इन्च अलोय ह्विललगायत अन्य सुविधा छ । महिन्द्राका यी दुवै एसयूभीहरू निकै उत्कृष्ट, स्टाइलिस तथा फ्यूचरिस्टिक देखिन्छ ।

एक्सईभी ९ई र बीई ६ई को ५९ किलोवाट ब्याट्री प्याकले २३१ एचपीको पावर उत्पादन गर्छ र ७९ किलोवाट ब्याट्री प्याकले २८६ एचपीको पावर र ३८० एमएमको टर्क जेनेरेट गर्छ । यी दुवै एसयूभीहरू ६.७ सेकेन्डमा ०–१०० किलोमिटर प्रतिघण्टाको गतिमा चलाउन सकिन्छ । बीई ६ई ले सिंगल चार्जमा ६८२ किलोमिटर र एक्सईभी ९ई ले सिंगल चार्जमा ६५६ किलोमिटर रेन्ज प्रदान गर्छ ।

कस्तो रहला नेपाली बजार
महिन्द्रा नेपाली बजारका लागि निकै पुरानो र परिचित ब्रान्ड हो । यसको स्कर्पियो लगायत एसयुभी र बोलेरो जस्ता पिकअप ट्रक नेपाली बजारमा सर्बाधिक रुचाइएको मोडलमा पर्छन् । कम्पनीको बिक्री पछिको सेवा समेत देशभर विस्तार भएको छ ।

कम्वसन गाडीमा जस्तै ईभीमा भने महिन्द्रालाई लोकप्रियता हासिल गर्न निकै कठिन हुने देखिन्छ । बजारमा अहिले चिनियाँ ब्रान्डका ईभीले एकछत्र बजार पाइरहेको छ भने भारतीय ब्रान्डकै अर्को ईभी टाटाले बजारमा कठिन प्रतिस्पर्धा गर्नुपरेको अवस्था छ ।

नेपाली बजारमा ईभीको स्वाद चखाउने ब्रान्ड नै महिन्द्रा हो । महिन्द्राका साना ईभी सडकमा गुडेको देख्दा रमाउनेहरु समेत अहिले प्रशस्तै छन् । तर पछिल्लो समयमा महिन्द्राले ती साना ईभीको उत्पादन नै बन्द ग¥यो ।

हाल नयाँ स्टाइल र अत्याधुनिक फिचरका साथ महिन्द्राका ईभी सार्वजनिक भएका छन् । भविष्यमा अवश्य पनि यी ईभी नेपाली बजारमा समेत उपलब्ध हुनेछन् ।

यद्यपि प्रतिस्पर्धी मुल्यका कारण नेपालमा मात्रै नभई विश्व बजारमै लोकप्रिय बन्दै गएको चिनियाँ ईभीको तुलनामा महिन्द्राका यी दुई ईभीले कस्तो उपस्थिति जनाउलान्, त्यो भने भविष्यले नै बताउने छ ।