हवाईजहाजबाट प्रेरित महिन्द्राको नयाँ अटोरिक्सा, यस्तो छ मूल्य, फिचर र रेन्ज

महिन्द्राले लास्ट माइल मोबिलिटी सेग्मेन्टलाई लक्षित गरी ‘उडो’ अल–इलेक्ट्रिक अटोरिक्सा सार्वजनिक गरेको छ । मोनोकोक चेसिसमा आधारित उक्त रिक्साको मूल्य ३ लाख ५९ हजार भारु निर्धारण गरिएको छ ।

सो नयाँ अटो रिक्साको डिजाइन हवाईजहाजबाट प्रेरित रहेको कम्पनी भनाई छ । त्यसैले यसको नाम उडो दिइएको हो, जसको हिन्दीमा अर्थ ’उडान’ भन्ने हन्छ । अटोरिक्साको पछाडी फराकिलो सिट उपलब्ध गराइएको छ, जसले राम्रो लेगरूम र हेडरूम प्रदान गर्दछ ।

उडो अटो रिक्साको डिजाइन प्रख्यात डिजाइनर प्रताप बोसले तयार पारेका हुन् । रिक्सामा फ्ल्याट सर्फेस र शार्प एंगल भएको बक्सी प्रोफाइल दिइएको छ । यसमा उच्च रेक्ड विन्डशील्ड, बोल्ड हेडल्याम्प भएको ठाडो फ्रन्ट फेसिया,र पछाडिको प्यानलमा ’महिन्द्रा’ अक्षर लेखिएको ठाडो टेललाइट राखिएका छन् ।

उडोमा ११.७ किलोवाट आवर क्षमताको लिथियम–आयन ब्याट्री र १३.४ बिएचपी तथा ५२ एनएम टर्क जेनेरेट गर्ने विद्युतीय मोटर उपलब्ध गराइएको छ । ५५ किलोमिटर प्रतिघण्टाको उच्च गतिमा हाँक्न सकिने सो रिक्साले एकपटकको फुल चार्जमा २६५ किलोमिटर रेन्ज दिने दाबी गरिएको छ ।

साथै, यसमा रेन्ज, राइड र रेस गरी तीनवटा ड्राइभिङ मोड उपलब्ध छ । महिन्द्राले यसमा रिजेनेरेटिभ ब्रेकिङ सिस्टम सहित फर्स्ट–इन–सेगमेन्ट रिभर्स थ्रोटल, हिल होल्ड असिस्ट र क्रिप फंक्सन जस्ता सुविधा उपलब्ध गराएको छ ।