नेपालमा बिक्री शुरु नहुँदै १ लाख भारुसम्मले महंगो भयो स्कर्पियो एन

नेपाली बजारमा लामो समयदेखी प्रतिक्षा गरिँदै आएको महिन्द्रा स्कर्पियो एन १ लाख भारुसम्मले महंगो भएको छ । ६ महिनाअघि नेपाल र भारतमा एकसाथ लन्च गरिएको यो एसयूभीको नेपालमा हालसम्म पनि बिक्री शुरु हुन सकिरहेको छैन ।

विगतमा आयत प्रतिवन्धका कारण नेपाल आउन नपाएको यो एसयूभीको अहिले भारतमै माग उच्च छ । जसका कारण नेपालमा यो एसयूभीको बिक्री कहिलेबाट शुरु हुन्छ भन्ने विषययमा आधिकारिक वितरक अग्नी इन्कर्पोरेटेड प्रालि नै अनिर्णित रहेको छ ।

महिन्द्राले यो एसयूभीको शुरुवाती मूल्य ११ लाख ९९ हजार भारु निर्धारण गरेर बिक्री शुरु गरेको थियो । अहिले यसको वेस भेरियन्ट पेट्रोलको मूल्य भारतीय बजारमा १२ लाख ७४ हजार पुगेको छ भने डिजेल वेसको १३ लाख २४ हजार कायम गरिएको छ । यो एसयूभी अव नेपाल आउँदा ५ लाख रुपैयाँसम्म मूल्य वढेर आउने देखिन्छ ।

महिन्द्राले यो नयाँ एसयूभीलाई ५ ट्रिममा उपलव्ध गराउँदै आएको छ । यसको सवै भेरिएन्ट ७ सिट क्षमतामा उपलब्ध रहँदै आएपनि टप स्पेकको जेड८ एल भेरियन्टको सेकेन्ड रोमा भने क्याप्टेन सिट सहितको ६ सिट अप्सन दिइएको छ ।

२.० लिटर टर्वो पेट्रोल र २.२ लिटर डिजेल इन्जिनमा उपलब्ध स्कर्पियो एनको पावर क्रमश १९८ विएचपी र १७३ विएचपी रहेको छ भने टर्क ३८० एनएम र ४०० एनएम रहेको छ ।

यो एसयूभीमा ८ इन्चको टचस्क्रिन इन्फोटेन्मेन्ट सिस्टम, वायरलेस एन्ड्रोइड अटो एवं एप्पल कार प्ले, ६ तवरबाट एड्जस्ट गर्न मिल्ने ड्राइभर सिट, इलेक्ट्रोनिक सनरुफ, रिभ्यू क्यामेरा, क्रुज कन्ट्रोल र वायरलेस चार्जिङ लगायत फिचर दिइएको छ ।