महिन्द्राका दुई नयाँ ईभी बीई६ र एक्सईभी ९ई नेपालमा लन्च हुँदै, मूल्य सार्वजनिक

काठमाडौं – महिन्द्राका दुई नयाँ ईभी बीई६ र एक्सईभी ९ई नेपाली बजारमा उपलब्ध हुने भएका छन् । भारतमा केही समय पहिले नै लन्च भइसकेको भए पनि नेपाली बजारमा भने यी दुई ईभी अझै उपलब्ध छैनन् । तर अब भने नेपाली ग्राहकले समेत यी दुई ईभी पाउने भएका छन् ।

महिन्द्राको नेपालका लागि आधिकारिक वितरक अग्नि ग्रुप अन्तर्गतको अग्नि इनर्जीले भन्सार प्रयोजनका लागि यी दुई ईभीको मूल्य सार्वजनिक गरेको छ । यस अनुसार महिन्द्रा बीई६ का दुई भेरिएन्ट नेपाली बजारमा उपलब्ध हुनेछन् । यी दुई भेरिएन्टको मूल्य क्रमशः ७६ लाख ३० हजार र ८३ लाख ८० हजार रुपैयाँ हुनेछ ।

त्यसैगरी एक्सईभी ९ईका तीन भेरिएन्ट नेपालमा उपलब्ध हुनेछन् । यी तीन भेरिएन्टको मूल्य क्रमशः ७७ लाख ६५ हजार, ८७ लाख १५ हजार र १ करोड ७ लाख रुपैयाँ हुनेछ । यद्यपि लन्चिङ समय सम्ममा यो मूल्यमा केही परिवर्तन पनि हुन सक्छ । केही दिनमै यी दुई गाडी नेपाली बजारमा सार्वजनिक हुने कम्पनीको तयारी रहेको बताइएको छ ।

महिन्द्राका यी दुई ईभीले हाल निकै नै चर्चा पाएका छन् । भारतीय बजारमा निकै नै रुचाइएका यी मोडल नेपाली बजारमा पनि धेरैको रोजाइमा पर्ने अनुमान गरिएको छ । दुवै गाडीमा ९९ किलोवाटको मोटर छ भने एक्सईभी ९ईको एउटा भेरिएन्टमा १९९ किलोवाटको मोटर छ ।

कम्पनीले सो दुबै एसयूभीमा ५९ किलोवाट र ७९ किलोवाटसम्मको ब्याट्री प्याक उपलब्ध गराएको छ । यसमा एलएफपी केमिस्ट्री भएको ब्याट्रीहरू छन् जसलाई अल्ट्रा फास्ट चार्जिङले सपोर्ट गर्छ । यसलाई १७५ किलोवाटको चार्जरको मद्दतले २० मिनेटमा २० देखि ८० प्रतिशतसम्म चार्ज गर्न सकिन्छ।

एक्सईभी ९ई र बीई ६ को ५९ किलोवाट ब्याट्री प्याकले २३१ एचपीको पावर उत्पादन गर्छ र ७९ किलोवाट ब्याट्री प्याकले २८६ एचपीको पावर र ३८० एमएमको टर्क जेनेरेट गर्छ । यी दुवै एसयूभीहरू ६.७ सेकेन्डमा ०-१०० किलोमिटर प्रतिघण्टाको गतिमा चलाउन सकिन्छ। बीई ६ ले सिंगल चार्जमा ६८२ किलोमिटर र एक्सईभी ९ई ले सिंगल चार्जमा ६५६ किलोमिटर रेन्ज प्रदान गर्छ । महिन्द्राका यी दुवै इलेक्ट्रिक एसयूभीमा लाइफटाइम ब्याट्री वारेन्टी दिइएको छ ।