७० दिनमा १० हजार ग्राहकले पाए महिन्द्राका दुई नयाँ ईभी, नेपालमा रोड टेष्ट चल्दै

महिन्द्राले आफ्नो दुई नयाँ ईभी ग्राहकलाई हस्तान्तरण गर्न थालेको ७० दिन पुरा भएको छ । यस अवधिमा १० हजार युनिट कार हस्तान्तरण गरिएको कम्पनीले जनाएको छ ।

गत वर्ष नोभेम्बरमा लन्च गरिएका आफ्ना दुई ईभी ‘बीई६ र एक्सईभी ९ई’ को डेलिभरीलाई कम्पनीले रफ्तारमा अघि बढाइरहेको हो । लन्च भएको पहिलो दिनमै ३० हजार भन्दा बढी बुकिङहरू प्राप्त गरेको कम्पनीले डेलिभरी भने मार्च २०, २०२५ देखि सुरु गरेको थियो ।

महिन्द्राका अनुसार, एक्सईभी ९ई ले कुल बुकिङको ५६ प्रतिशत ओगटेको छ भने ४४ प्रतिशत ग्राहकले बीई ६ रोजेका छन् । बीई६ को सुरुवाती मूल्य १८ लाख ९० हजार र एक्सईभी ९ईको २१ लाख ९० हजार भारु पर्छ ।

दुबै इलेक्ट्रिक एसयूभी ५९ र ७९ किलोवाट आवर ब्याट्री अप्सनमा उपलब्ध छन् । जसमध्ये, बीई६ ले ५३५ र ६८२ तथा एक्सईभी ९ई ले ५४२ र ६५६ किलोमिटर रेन्ज दिने दाबी गरिएको छ ।

महिन्द्राका यी दुबै ईभी नेपाली बजारमा समेत भित्रिइसकेका छन् । महिन्द्रा प्यासेन्जर कारको नेपालका लागि आधिकारिक वितरक अग्नि इन्कर्पोरेटेड प्रालिले केही समयअघि भन्सार प्रयोजनका लागि मूल्य सार्बजनिक गरेर यी ईभी छिट्टै उपलब्ध हुने जनाउ दिएको छ । सम्भवतः आगामी नाईमा मोबिलिटी एक्सपोमा यी कार लन्च हुनेछन् ।

नेपाली सडकमा परिक्षण भइरहेका यी ईभीको सुरुवाती मूल्य ७६ लाख ३० हजार तोकिएको छ भने सबैभन्दा महंगो भेरिएन्टलाई १ करोड ७ लाख रुपैयाँ पर्ने बताइएको छ ।